Kalpan Judá miyekpa okikauj Jehová niman okinueyichiuj tajtsitsintin. Pampa, Jehová kinekiya kinpaleuis okomintitlanili iteotlajtokauan, san ika, xokinkakisnejkej. Niman xsan yejon, noijki okinpipinaujtijkej. ¿Kenon okitelti Jehová ika manoueyichiuakan tajtsitsintin?

Tekiuaj ipan Babilonia, Nabucodonosor, ika yolik okinotlatkitijtia kalpamej. Ijkuak kemach okinotlatkiti Jerusalén, okajsik tekiuaj Joaquín, akin ueyixtokej, tlaixnamijkej niman artesanos niman okinuikak Babilonia. Noijki okuikak tlen melak tlasojtiya tlen onkatka ipan iteopan Jehová. Sakin, Nabucodonosor okitlali Sedequías ken tekiuaj ipan Judá.

Kachtopa, Sedequías kitlakamatiya Nabucodonosor. San ika, kalpamej tlen nisiuj nokauayaj niman teotlajtokej tlakajkayaujkej okijlikej tekiuaj Sedequías makixnamiki Babilonia. Jeremías okimelajkaijli: “Tla tikixnamiki onias mikilistli, apistli niman kokolistli ipan Judá”.

Ijkuak yopanoka chikueyi xiuitl, Sedequías okixnamik Babilonia niman okintlajtlanili tlaixnamijkej itech Egipto makipaleuikan. Kuakon, Nabucodonosor okintitlan babilonios makixnamikitij Jerusalén. Yejuamej okiyeualojkej ueyikalpan. Jeremías okijli Sedequías: “Jehová kijtoua ika tla timotemaka itech Babilonia, tejua niman ueyikalpan nenmakisaskej. San ika, tla xtikchiua, babilonios kitlatiskej Jerusalén niman tejua mitsuikaskej”. Sedequías okijto: “Xninotemakas”.

 Ijkuak opanok se xiuitl uan tlajko, babilonios okixoxotonijkej seki itech itepanuan Jerusalén niman okitlatijkej ueyikalpan. Noijki okitlatijkej teopan, miyekej okinmiktijkej niman oksekimej okinuikakej.

Sedequías ocholoj itech Jerusalén, san ika, babilonios okajsikej nisiuj Jericó niman okuikakej ixpan Nabucodonosor. Tekiuaj okichiuj ika Sedequías makita kenon kinmiktiayaj ikoneuan. Kuakon okichiuj maka sa matlachia niman okitsauk. Ompa omik Sedequías. San ika, Jehová okijli kalpan Judá: “Ijkuak panos 70 xiuitl, oksejpa nimechuikas nemochan Jerusalén”.

¿Tlenon panoskia inuan telpokamej akin kinuikaskiaj Babilonia? ¿Ok yolmelaujkanemiskiaj itech Jehová?