Batho ba Juda ba ile ba tlogela Jehofa gantšintši gomme ba rapela medimo ya maaka. Jehofa o ile a fetša mengwaga e mentši a leka go ba thuša. O ile a romela baporofeta ba bantši gore ba ba thuše go boela go yena, eupša ba gana go theetša. Go e na le gore ba theetše, ba be ba kwera baporofeta ba Jehofa. Jehofa o ile a ba lokiša bjang?

Kgoši ya Babilona e lego Nebukadinetsara, o be a fenya ditšhaba ka go latelana. Ge a be a fenya Jerusalema ka lekga la mathomo, o ile a tšea Kgoši Jehoyakini, dikgošana, mašole a Juda le bašomi bao ba nago le bokgoni gomme a ba iša Babilona. O ile a tšea le mahumo ka moka a tempeleng ya Jehofa, gomme a kgetha Tsedekia gore e be kgoši ya Juda.

Mathomong, Tsedekia o be a ekwa Nebukadinetsara. Eupša ditšhaba tša kgauswi le naga ya Juda le baporofeta ba maaka di ile tša botša Tsedekia gore a se sa kwa Nebukadinetsara. Jeremia a botša Tsedekia a re: ‘Ge o ka tlogela go kwa Nebukadinetsara, batho ba Juda ba tlo bolawa, ba hwa ka tlala le malwetši.’

Ka morago ga gore Tsedekia a buše ka mengwaga e seswai, o ile a se sa kwa Nebukadinetsara. O ile a kgopela mašole a Baegipita gore a mo thuše go lwa le Nebukadinetsara. Ke moka Nebukadinetsara a romela mašole a gagwe gore a yo hlasela motse wa Jerusalema. Mašole ao a ile a fihla a dula moo go dikologa motse wa Jerusalema. Jeremia a botša Tsedekia a re: ‘Jehofa o re ge o ka se lwe le Bababilona, ba ka se le bolaye, e bile ba ka se senye motse wa Jerusalema. Eupša ge o ka lwa le bona, ba tla fiša Jerusalema ka mollo gomme ba le iša kgolegong kua Babilona.’ Tsedekia a re go Jeremia: ‘Nka se ba tlogele, ke tlo lwa le bona!’

 Ka morago ga ngwaga le seripa, mašole a Babilona a ile a wiša maboto a Jerusalema gomme a fiša motse woo ka mollo. A ile a fiša tempele ya Jehofa ka mollo, a bolaya batho ba bantši gomme a iša ba bangwe ba bantši kgolegong kua Babilona.

Tsedekia o ile a kgona go tšhaba kua Jerusalema, eupša Bababilona ba mo rakediša. Ba ile ba mo swara a sa tla kgauswi le motse wa Jeriko gomme ba mo tliša go Nebukadinetsara. Kgoši Nebukadinetsara a bolaela barwa ba Tsedekia pele ga mahlo a gagwe. Ke moka a gonya Tsedekia mahlo gomme a mo lahlela kgolegong, moo a ilego a hwela gona. Eupša Jehofa o ile a tshepiša batho ba Juda bao ba bego ba le Babilona a re: ‘Ke tlo le bušetša Jerusalema ka morago ga mengwaga e 70.’

Go ile gwa direga eng ka masogana ao a bego a išitšwe kgolegong kua Babilona? Na a ile a dula a rata Jehofa?