Júdahgi Jiihóvah baa nídeijiyooʼnahgo diyin béédaʼalyaii bichʼįʼ nidahojiłá. Jiihóvah chʼééh háká análwoʼ. Bá dahalneʼii doo dajíistsʼą́ąʼ da. Éí tʼóó bá nidahojiłtʼiʼ. Eʼelyaii bichʼįʼ nahadlá yę́ę Jiihóvah haitʼéego íísdįįd?

Bábilan binaatʼáanii Nébukadnézzar éí binaa kéédahatʼínígíí yikʼeh hididleeh. Jerúsalem tsʼídá áłtsé yisnááh. Naatʼáanii Jehóíyakin, nantʼaʼí, nidaabaahii, dóó tʼáadoo leʼé ádeiłʼínígíí Bábilangóó ayííʼeezh. Kin biiʼ sohodizingi ílı̨́įgo chodaoʼínę́ę deineezʼı̨́ı̨́ʼ. Díí bikéédóó Nébukadnézzar éí Zedekáíyah Júdah binaatʼáanii ájiilaa.

Zedekáíyah éí Nébukadnézzar bikʼeh hojíłʼı̨́. Ákondi hanaagóó kéédahatʼíinii índa doo tʼáá aaníígóó dahalneʼii éí Zedekáíyah Nébukadnézzar bikʼijįʼ dííleeł, deiłní. Jeremáíyah áháłní: ‘Díí bikʼehgóó íinidzaago éí ląʼí diné nidootsił, dichin dóó naałniih hodooleeł.’

Zedekáíyah hojooʼáałgo tseebíí nááhai. Ńtʼééʼ Bábilan bikʼijįʼ dadiidleeł jiniizı̨́ı̨́ʼ. Íijip bisiláo nihíká adoojah bizhdííniid. Áko Nébukadnézzar bisiláo Jerúsalem yikʼiidoojah yiniyé ákǫ́ǫ́ yiʼníłniiʼ. Éí Jerúsalem binaagóó nidahaazná. Jeremáíyah éí Zedekáíyah ííłní: ‘Jiihóvah kóníłní, Bábilan tʼóó baa ádíínítʼą́ągo éí yisdádoohkah. Doo ákwíinidzaagóó éí Jerúsalem ałtso adeidoołkʼą́ą́ł. Ni éí awáalyahí dííleeł.’ Zedekáíyah ájíní: ‘Doo ákódeeshníił da!’

 Nááhai dóó nááʼáłníiʼgo, Bábilan bisiláo Jerúsalem binaa ahééʼítłʼin yę́ę táádayoostłʼíidgo yidahodeeznil. Kin biiʼ sohodizin adeideeskʼą́ą́ʼ, ląʼí diné nideistseed dóó ląʼí éí awáalyahí dajizlı̨́ı̨́ʼ.

Zedekáíyah éí Jerúsalemdę́ę́ʼ yóó azhnííchą́ą́ʼ, ndi Bábilan bisiláo tʼáá dahonéełchééh. Hoł dadeezdéelgo Nébukadnézzar yichʼįʼ adahazlóóz. Zedekáíyah hanááł hayeʼké nabiʼdistseed. Nébukadnézzar hanááʼ hayíʼííshiizh dóó awáalya ahóółtʼeʼ, tʼáá ákóneʼ dajiztsą́. Júdah dineʼé Jiihóvah ábíłní: ‘Tsostsʼidiin nááhai bikéédóó índa Jerúsalemjįʼ nánihideeshʼish.’

Ániid nidajikaigo Bábilangóó awáalyahí dajílı̨́įgo adahoʼdiishtʼeezh yę́ę haadajiidzaa? Jiihóvaásh tʼáá bikééʼ nijizı̨́?