Ovanthu vo mo Judaa vayeka-po Jeova iya avahimbika okufenda ono huku mbomatutu. Momanima omanyingi, Jeova watualako okuvekuatesako. Watuma ovauuli ovanyingi opo vevelondole, mahi avehetavela. Avahimbika okulinga omukuele ovauli. Oityi Jeova alinga opo amaneko efendelo olio liomatutu?

Ohamba Yombambilonia Nambukondonosole yatambulile omalongo aeho. Tete watambula o Jelusalei atuailila ohamba Joaquim, novana vohamba, nomafualali novanthu ovakuavo ko Mbambilonia. Tupu atyindi-po ovityuma vio mondyuo ya Jeova. Nambukondonosole alingi Zedekia ohamba yo mo Judaa.

Potete ankho Zedekia utavela ku Nambukondonosole. Mahi ovanthu vomalongo novauli vo matutu avahindila Zedekia opo atyitukile-po Ombambilonia. Jeremia evelondola okuti: ‘Inkha mutyitukila-po Ombambilonia, ovanthu vo mo Judaa mavankhi tupu mamukala ondyala onene.’

Etyi atumina momanima etyinana, Zedekia atyitukila-po Ombambilonia. Aiti ko Egitu omafualali opo evekuateseko. Nambukondonosole atumu omafualali akaluise o Jelusalei, alingi onthanda popepi nepunda-umbo. Jeremia apopila Zedekia okuti: ‘Jeova wati lifefei ko va Mbambilonia opo epunda-umbo lihahanyue-po. Mahi inkha kamutyilingi, ova Mbambilonia mavahanye-po o Jelusalei iya ove otualwa koupika.’ Zedekia ati: ‘Ame hilifefe ko va Mbambilonia!’

 Etyi palamba enima like notyihupe, omafualali o Mbambilonia anyingila mepunda-umbo lio Jelusalei aapake-mo otupia. Ayoko-po ondyuo ya Huku avaipaa ovanthu ovanyingi, ovakuavo avevetuala koukonde ko Mbambilonia.

Zedekia atundu mo Jelusalei akahateka mahi ova Mbambilonia avemulandula. Avemuvasi popepi no Jerikoo avemukuate avemutuala ku Nambukondonosole. Ohamba Yombambilonia aitumu ovana va Zedekia vaipawe otyo Zedekia atala. Konyima, Nambukondonosole atiula Zedekia omaiho, emupake mokaleya ngamo ankhila. Mahi Jeova apopila ovanthu vo ko Judaa okuti: ‘Konyima yomanima 70 mandyimukondola keumbo lienyi ko Jelusalei.’

Oityi matyiende novakuendye vatualwa koukonde ko Mbambilonia? Okuti mavatualako noukuatyili ku Jeova?