LEKSION 58
Aderal so Jerusalem
Paulit-ulit ya manrerebelde ed si Jehova iray taga Juda tan nandayew irad saray dios ya aliwan tua. Abaybayag la ya labay iran tulongan nen Jehova. Angibaki na dakel ya propeta pian ibagad sikara ya aliway gagawaen da, balet ag-ira dinmengel. Inelek-elekan da ni ingen iray propeta. Antoy ginawa nen Jehova pian ontunda lay pandadayew da ed saray dios ya aliwan tua?
Dakdakel lay bansan asakop na ari na Babilonia ya si Nabucodonosor. Nen asakop to met lay Jerusalem, inerel toy Arin Jehoiakin, saray prinsipe, saray mabiskeg ya sundalo, tan saray marunong a mankimey, insan to ra inawit ed Babilonia. Inala to met so amin ya kayamanan ed templo nen Jehova. Insan ginawa ton ari na Juda si Zedekias.
Diad gapo, uunoren nen Zedekias si Nabucodonosor. Balet saray kaabay dan bansa tan saray palson propeta et sinugsogan day Zedekias ya manrebelde ed ari na Babilonia. Imbagad sikato nen Jeremias: ‘No manrebelde ka, dakdakel ya totoo ed Juda so ompatey, naerasan, tan mansakit.’
Kayari na waloy taon, nanrebelde ed Babilonia si Zedekias tan nampatulong ed saray sundalo na Ehipto. Kanian imbaki nen Nabucodonosor iray sundalo to ya onlusob ed Jerusalem, tan nankampo ira ed paliber na satan a syudad. Imbaga nen Jeremias ed si Zedekias: ‘Imbaga nen Jehova ya no onsuko kad Babilonia, makaligtas ka tan sayan syudad. Balet no andi, poolan na saray taga Babilonia so Jerusalem tan ipriso da kad Babilonia.’ Balet imbaga nen Zedekias: ‘Agak onsuko!’
Kalabas na sakey tan kapalduan taon, binungaw na saray sundalo na Babilonia so padir na Jerusalem tan pinoolan day syudad. Apoolan so templo, dakdakel so totoon pinatey da, tan libolibo so inawit dad Babilonia pian ipriso da ra diman.
Akatakas si Zedekias, balet inusilan na saray taga Babilonia. Narel da diad asingger ed Jerico tan inawit dad si Nabucodonosor. Saray ananak a lalaki nen Zedekias et pinatey dad mismon arapan to. Insan binulag nen Nabucodonosor si Zedekias tan impriso to ya anggad ditan la inatey. Balet oniay im-promise nen Jehova ed saray taga Juda: ‘Kayari na 70 ya taon, ipawil ta kayo ed Jerusalem.’
Anto kasi nagawa ed saray kabataan ya inawit ed Babilonia? Si Jehova ni kasi so Dios ya dayewen da?
“Jehova a Dios, say Makapanyarin-amin, matua tan matunong iray panangukom mo.”—Apocalipsis 16:7
Ompan Nagustoan Mo Met
SAY BIBLIA—ANTO SO MENSAHE TO?
Maong tan Mauges ya Arari
Panon ya naapag ed duaran panarian so Israel?
SAY BIBLIA—ANTO SO MENSAHE TO?
Imbaki na Dios Iray Propeta To
Anton mensahe so impasabi na saray propeta na Dios? Amtaey apatiran teman impasakbay na saray propeta na Dios.
