Ri tinamit rech Judá kʼi taq mul xkʼojiʼ ta chi naqaj che ri Jehová xuqujeʼ xuqʼijilaj nikʼaj chik jastaq, o xuqʼijilaj e dioses che e qastzij taj. Pa ri e junabʼ riʼ, Jehová xraj xeʼutoʼ xeʼutaq e kʼi ajqʼaxal taq tzij. Are kʼu ri winaq xkibʼan ta ri xbʼix chke xuqujeʼ xetzeʼn chkij. Jehová kraj kusachisaj uwach ri qʼijilanik chke nikʼaj chik dioses. ¿Jas kubʼan che ubʼanik?

Ri ajawinel re Babilonia, Nabucodonosor, tajin kuchʼak jun tinamit chrij jun chik. Ri nabʼe mul che xuchʼak Jerusalén, xuchap ri ajawinel Joaquín, ri e príncipes, ajchʼojabʼ xuqujeʼ artesanos, xuqujeʼ xeʼukʼam bʼi pa Babilonia. Xuqujeʼ xukʼam bʼi ri tesoros rech ri loqʼalaj rachoch ri Jehová. Tekʼuriʼ, Nabucodonosor xukoj Sedequías che ajawinel pa uwiʼ ri Judá.

Chi xumajij, ri ajawinel Sedequías kunimaj ri Nabucodonosor. Are kʼu ri ajqʼaxal taq tzij che e qastzij taj xuqujeʼ ri winaq rech ri tinamit che e kʼo che unaqaj xkibʼij che Sedequías che kniman ta che ri ajawinel re Babilonia. Jeremías xubʼij che: «We katniman taj, kpe kamisanik, wiʼjal xuqujeʼ yabʼil pa Judá».

Chiʼ qʼaxinaq chi wajxaqibʼ junabʼ, ri ajawinel Sedequías xniman ta chi che ajawinel re Babilonia, xutaʼ tobʼanik chke ri ajchʼojabʼ re Egipto. Rumal laʼ, Nabucodonosor xutaq bʼi rajchʼoj rech kchʼojin rukʼ Jerusalén. Ri ajchʼojabʼ rech Babilonia xekʼojiʼ naqaj che ri tinamit. Jeremías xubʼij che Sedequías: «Jehová kubʼij che we kaya awibʼ pa kiqʼabʼ ri Babilonios, at xuqujeʼ ri tinamit kixkʼasiʼ kanoq. Are kʼu we at kaya ta awibʼ, e areʼ kkikʼatisaj Jerusalén xuqujeʼ katkʼam bʼi pa cheʼ».  Sedequías xubʼij: «Kinya ta wibʼ pa uqʼabʼ».

Qʼaxinaq jun junabʼ rukʼ nikʼaj, ri babilonios xkiwulij jun chʼaqap che ri tapya re Jerusalén. Chilaʼ xeʼok bʼi pa ri tinamit xuqujeʼ xkikʼatisaj. Xuqujeʼ xkikʼatisaj ri loqʼalaj ja, xkikamisaj e kʼi winaq xuqujeʼ xkikʼam bʼi kʼi rech keya pa cheʼ.

Sedequías xel bʼi pa Jerusalén, are kʼu ri babilonios xkiterenej bʼik, xkichapo are chiʼ kʼo naqaj che Jericó, xkʼam bʼi chuwach ri ajawinel Nabucodonosor. Ri ajawinel xutaqchiʼj ri Sedequías che rilik ri kbʼan che ukamisaxik ri e ralkʼwal. Tekʼuriʼ, xubʼan moy che xuqujeʼ xunim pa cheʼ. Chilaʼ xkam wi ri Sedequías. Are kʼu ri Jehová xubʼan wajun tzujunik riʼ che ri tinamit re Judá: «Are chiʼ qʼaxinaq chi 70 junabʼ kixintzalij pa iwachoch pa Jerusalén».

¿Jas kkʼulmataj kukʼ ri alabʼom alitomabʼ che xekʼam bʼi pa Babilonia? ¿La amaqʼel keʼux sukʼ chuwach ri Jehová?