Judä nunakunaqa atska kutichömi Jehoväta jaqirïkur imäginkunata adorar kakuyarqan. Y yanapëta munarmi Jehoväqa jutinchö willakoqninkunata mëtsikata kacharqan. Peru manam cäsuyarqantsu, antis burlakurmi ushayarqan. Jehoväqa manam munarqantsu imäginkunata adorar sïguiyänanta. ¿Y imatataq rurarqan?

Babiloniapa reynin Nabucodonosormi juk nacionkunata dominar qallëkurqan. Nöpatapis tröpankunawan Jerusalenyaq yëkïkurmi rey Joaquinta, dirigentikunata, soldädukunata y artesänukunata prësu apakurqan. Jina Jehoväpa templunchö fortünakunatapis apakurqanmi. Nïkurmi Judäpa reynin kanampaq Sedequïasta churarqan.

Rey tikrarirqa, Sedequïasqa Nabucodonosorta cäsukoqmi. Peru Diospa willakoqnin tukoqkuna y amänun nacion nunakunam contran sharkunampaq niyarqan. Tsënam Jeremïasqa kënö nirqan: “Contran sharkuptikiqa wanutsinakï, mallaqë y qeshyakunam Judächö kanqa”.

Puwaq wata gobernarirmi rey Sedequïasqa Nabucodonosorpa contran sharkur Egiptu tröpakunapa yanapakïninta ashirqan. Tsëmi Nabucodonosorqa tröpankunata Jerusalenman kacharqan. Y chärirmi Jerusalenpa jiruroqninchö carpankunata patsätsiyarqan. Jeremïasqa kënömi Sedequïasta nirqan: “Entregakurqa manam ni qam ni markëki ushakäyankitsu. Manaqa Jerusalenta kayëkurmi prësu apakuyäshunki”. Peru pëqa, “¡manam entregakushaqtsu!” nirqanmi.

Babilonia tröpakunaqa juk wata pullan shuyärirmi Jerusalenpa perqanta juk lädupa juchuratsirnin yëkïkur llapanta kayëkuyarqan.  Jina templutapis kayëkuyarqanmi, y mëtsika nunakunatam wanutsiyarqan, y wakintaqa prësum apakuyarqan.

Sedequïasqa escaparmi ëwakurqan, peru Babilonia soldädukunaqa Jericö ëwëchö taripëkurmi rey Nabucodonosorman apayarqan. Nabucodonosorqa Sedequïas rikëkaptin wamrankunata wanutsiyänampaqmi mandakurqan. Nïkurmi wiskuyäratsirnin carcelman llawiratsirqan. Tsëchömi Sedequïasqa wanurqan. Peru Jehoväqa kënömi Judä nunakunata nirqan: “70 wata pasariptinmi markëkikuna Jerusalenman kutitsiyämushqëki”.

¿Babiloniaman apakuyanqan jövinkunataqa imaraq pasarqan? ¿Qonqëkuyarqantsuraq Jehoväta?