Judá llajtapi causajcunaca achca cutinmi Diosmanta caruyashpa yanga dioscunata adorarcacuna. Chai huatacunapica Yaya Diosca achca profetacunatami paicunata ayudachun cacharca. Pero paicunaca mana cazurcacunachu, ashtahuanpish burlarircacunami. Yanga dioscunata ama adorashpa catichunca ¿Jehová Diosca imatataj rurarca?

Babiloniata mandaj Nabucodonosorca tucui llajtacunatami mishacurca. Punta cutin Jerusalenta mishashpaca mandaj Joaquinta, shujtaj mandajcunata, alli soldadocunata, alli trabajajcunatapishmi Babiloniaman aparcacuna. Diospaj huasipi tiyaj cullquita, orotapishmi aparcacuna. Qꞌuipaca Nabucodonosorca Judá llajtata mandachunmi Sedequiasta churarca.

Callaripica Sedequiasca Nabucodonosorta cazurcami. Qꞌuipaca llullashpa huillaj profetacuna, cꞌuchulla llajtacunapi causajcunaca Sedequiastaca Nabucodonosorta ama cazuichu nircacunami. Chaimi Jeremiasca, ‘mana cazujpica Judá llajtapica yaricai, ungüi, huañuimi tiyanga’ nirca.

8 huatacuna qꞌuipaca Sedequiasca babiloniocunata mana cazushpami egipcio soldadocunata ayudachun mañarca. Chaimantami Nabucodonosorca llaquichichun soldadocunata cacharca. Chai soldadocunaca Jerusalén muyundijpimi carpa huasicunata shayachircacuna. Jeremiasca Sedequiastaca, ‘paicunata cazushpaca quishpiringuichijmi. Pero mana cazushpaca cai llajtata rupachishpami cantapish prezu apangacuna ninmi Yaya  Diosca’ nircami. Chashna nijpipish paica, ‘¡manataj cazushachu!’ nircami.

Shuj huata chaupi qꞌuipaca babiloniocunaca Jerusalén jatun pircatami shuj mirgata tꞌunircacuna. Chaita yaicushpami achca gentecunata huañuchishpa, huaranga gentecunata prezu apashpa Diospaj huasita, llajtatapish rupachircacuna.

Sedequías miticushpa rijpipish babiloniocunaca catishpami Jericó cꞌuchullapi japishpa, Nabucodonosorpajman aparcacuna. Nabucodonosorca Sedequiaspaj ñaupajpimi paipaj churicunata huañuchichirca. Qꞌuipaca ñahui luluncunata llujshichishpami prezupi churarca. Chaipimi Sedequiasca huañurca. Pero Jehová Diosca Judapi causajcunataca, ‘70 huatacuna pajtajpimi cancunataca Jerusalenman tigrachimusha’ nircami.

¿Babiloniaman apashca jovencunaca imashi tucurcacuna? ¿Jehová Diosta shungumantachu cazushpa catircacuna?