Juda nacionpi yachaqkunam taytacha-mamachata yupaychaspanku achka kutipi Jehova Diosta qunqarurqaku, chaymi Diosqa willakuqninkunawan yanaparqa. Juda runakunam ichaqa mana kasukurqakuchu, chaymi Jehova Diosqa enemigonkunaman quykurqa.

Babiloniata kamachiq Nabucodonosormi llaqtakunata munaychakurqa. Chaymi Jerusalenpi kamachiq Joaquintapas riqsisqa runakunatawan Babiloniaman aparurqaku, apakurqakutaqmi Diospa wasinpi chaninniyuq kaqkunatapas. Juda nacionpipas Sedequiastañam kamachiq kananpaq churarurqa.

Qallariypiqa Nabucodonosortam Sedequiasqa kasukurqa. Ichaqa Diosmanta willakuq tukuqkunawan runakunam umacharqaku mana kasukunanpaq. Chaymi Jeremiasqa nirqa: “Mana kasukuptikiqa Juda nacionpim kanqa yarqay, unquy hinaspa wañuypas”, nispa.

Sedequiasñataqmi pusaq wataña kamachichkaspan Babiloniapa contranpi hatarirurqa, hinaspam Egipto nacionpa yanapakuyninta mañakurqa. Babilonia soldadokunañataqmi Jerusalenta muyurirurqaku, chaymi Jeremiasqa Sedequiasta nirqa: “Diospa nisqanman hinam Babilonia kamachiqkunaman entregakunayki, mana chayqa runaykikunapiwanmi wañunkichik, Jerusalenpas kañasqam kanqa”, nispa. Sedequiasñataqmi nirqa: “¡Manam entregakusaqchu!”, nispa.

 Wata partenmantañataqmi Jerusalenta hinaspa Diospa wasintapas kañaykurqaku. Achka-achka runakunatam wañurachirqaku, wakintañataqmi presota aparqaku.

Sedequiasñataqmi lluptikurqa, ichaqa Babiloniamanta soldadokunam qatispanku Jerico llaqtaman chayaykunapi hapirurqaku, hinaspam kamachiq Nabucodonosorman aparqaku. Nabucodonosorqa Sedequiastam pusarqa churinkunapa wañusqanta qawananpaq, hinaspapas ñawsayarachispanmi presocharurqa. Chaypim Sedequiasqa wañukurqa, Jehova Diosmi ichaqa Juda runakunata nirqa: “70 wata pasaruptinmi Jerusalenman kutichisqaykichik”, nispa.

Babiloniaman apachikuq mozokunaqa, ¿hinallachu Jehova Diosta yupaycharqaku?