O manuša ki Juda but puti bisterdže e Jehova hem služindže e hovavne devljendže. O Jehova but berša trudindža pe te pomožini ljen. Ov bičhaldža buten prorokonen te upozorini ljen, ama on umesto te šunen ljen, on asandilje ljendže. Sar o Jehova mothovdža ljendže so na valjani te služinen e hovavne devljendže?

O Navuhodonosor, o kralj ando Vavilon, pobedindža buten narodon. Ked prvo puti osvojindža o Jerusalim, ov phanlja e kraljo e Joahine, e manušen kola hine knezija, e vojnikonen, e manušen so hine zanatlije hem ljegardža ljen ko Vavilon. Isto adžahar, ov ljelja sa o barvaljipe ando e Jehovaso hram. Palo odova, o Navuhodonosor čhivdža e Sedekija te ovel kralj ki Juda.

Ko početko, o Sedekija šundža e Navuhodonosore. Ama, o narodija so hine uzo ljende hem o hovavne prorokija vačerdže e Sedekijase te bunini pe protiv o Vavilon. O Jeremija upozorindža lje: „Ako bunineja tut protiv o Vavilon, ki Juda ka ovel baro mudaribe, bokhaljipe hem nabormipe.“

Palo ofto berš, o Sedekija odlučindža te bunini pe protiv o Vavilon. Rodindža pomoć kotar i egipatsko vojska. Ama, o Navuhodonosor bičhaldža pe vojska te napadini o Jerusalim hem i vojska opkolindža celo diz. O Jeremija phendža e Sedekijase: „O Jehova phenela so ako predajineja tut e Vaviloncendže, ka ačhove dživdo hem i diz na ka ovel uništimi. Ama, ako na predajineja tut, o Vaviloncija ka tharen o Jerusalim, a tut ka ljen sar robo.“  O Sedekija phendža: „Na ka predajinav man!“

Palo jekh tekvaš berš, i vavilonsko vojska rušindža o zidija kotar o Jerusalim hem thardža celo diz. On thardže o hram, mudardže buten manušen hem buten ljelje te oven oljenge robija.

O Sedekija našlja ando Jerusalim, ama o Vaviloncija dželje palo ljeste. Astardže lje paše uzo Jerihon hem ljegardže lje ko Navuhodonosor. O vavilonsko kralj naredindža o Sedekija te dikhel sar mudarena ljese čhaven anglo ljeste. Palo odova, o Navuhodonosor korjačerdža e Sedekija, čhivdža lje ko phanljipe hem odothe mulo. Ama, o Jehova e manušendže andi Juda obećindža: „Palo 70 berš, paljem ka irinav tumen ko Jerusalim.“

Ama, so ulo e ternencar kola hine ljegarde ko ropstvo ko Vavilon? Da li ačhilje verna e Jehovase?