И мануша, савэ жувэнас андэ царство Иуда, вся упалэ и упалэ ашавэнас лэ Иеговас и тэлёнас хохавнэ дэвлэнди. Бут бэрша о Иегова бут со терэлас, кай тэ поможый лэнди, во бишалэлас бутэн пэстирэн пророконэн. Но и мануша на ашунэнас лэн. Вонэ приасанаспэ лэ Иеговастирэ пророконэндар. Со о Иегова стердя?

О вавилонско царё о Навуходоносоро захутилэлас ек пала ек о царство. Кала во пэрво разо захутилдя о Иерусалимо, во заля андо плено, андо Вавилоно бутэ манушэн. Савэн? Када сас о царё о Иехония, и князёря, и воиноря и кодэла, ко драго ӷанэнас тэ терэн пэстири бути. Кадяжэ во заля вся о сомнак анда лэ Иеговаско храмо. После када о Навуходоносоро стодя лэ Седекияс, кай во тэ авэл царё.

Спэрва о Седекия кандэлас лэ Навуходоносорос. Но и народоря, савэ жувэнас паша лэстэ и хохавнэ пророкоря ԥэнэнас лэ Седекиясти, кай во тэ жал против Вавилоно. О Иеремия ԥэндя лэ Седекиясти: «Сар ту жаса против Вавилоно, тоди андэ Иуда лэла тэ терэлпэ кацаво, кай о мануш лэла тэ умарэл аврэ манушэс, авэла боқалимос и насвалимос».

О Седекия правияс, сар царё, восемь бэрш. После када, во закамля тэ жал против Вавилоно. Во мангля, кай о войско анда Египто тэ поможый лэсти. Тоди о Навуходоносоро бишалдя пэско войско каринг о Иерусалимо, кай вонэ тэ тердён всаворэ ригэндар. О Иеремия ԥэндя лэ Седекиясти: «О Иегова ԥэнэн, кай кала ту сдэсапэ лэ Вавилоности, тоди ту фэриса пэс и вся о форо. Ай сар най, тоди  и вавилоняноря сԥабарэна о Иерусалимо, ай тут залэна андо плено». О Седекия ԥэндя: «Мэ на сдавапэ!»

Сар прожыля ек епашэса бэрш и воиноря анда Вавилоно розмардэ и иерусалимско стина и динэ яг о форо. Вонэ сԥабардэ о храмо, умардэ бутэ манушэн и залинэ андо плено тысячи манушэн.

О Седекия унашлятар анда Иерусалимо. Но и вавилоняноря нашлэ пала лэстэ. Вонэ астардэ лэс паша Иерихоно и андэ каринг о Навуходоносоро. О Вавилонско царё умардя лэ Седекиястирэ шавэн лэстэ пэ яқа. Кадяжэ о Навуходоносоро стердя кадя, кай во ашэля коро. Тоди во шутя лэ Седекияс андо баруно и сар прожыля время, во котэ муля. Но Иегова дя алав лэ народости анда Иуда: «Через 70 бэрш мэ рисарава тумэн цэрэ андо Иерусалимо».

Со стердяпэ лэ тэрнэ шавэнца, савэн залинэ андо вавилонско плено? Парашэлэ вонэ тэ кандэн лэ Иеговас чи най?