Fani mingi, azo ti Juda azia Jéhovah na ala voro anzapa ti wataka. Teti ngu mingi, Jéhovah angbâ lakue ti aidé ala. Lo tokua gbâ ti aprophète ti gboto mê ti ala, me ala mä ndo ape. Ala he ti ala aprophète ni hengo. Jéhovah asara si vorongo ayanda ti ala ni ahunzi tongana nyen?

Nébucadnezzar, so ayeke gbia ti Babylone, amû lani akodro na peko ti terê. Na ngoi so lo mû kodro ti Jérusalem, lo gbu Gbia Jéhoïakin, amokonzi, angangu turugu nga na azo so ahinga ti sara akua ti maboko, lo mû ala kue lo gue na ala na Babylone. Lo mû nga amosoro kue ti yâ ti temple ti Jéhovah. Na pekoni, Nébucadnezzar asara si Sédécias aga gbia ti Juda.

Na tongo nda ni, Sédécias amä yanga ti Nébucadnezzar. Me amara so angoro Juda nga na aprophète ti wataka atene na Sédécias ti sara kpengba-li na Babylone. Jérémie agboto mê ti lo, atene: ‘Tongana mo sara kpengba-li, kuâ, kota nzara nga na kobela ayeke ga ande na ndö ti Juda.’

Na peko ti so lo komande teti ngu miombe, Sédécias akomanse ti sara kpengba-li fadeso na Babylone. Lo hunda na aturugu ti Égypte ti mû maboko na lo. Na pekoni, Nébucadnezzar atokua aturugu ti lo ti gue ti sara bira na Jérusalem, na ala sara camp ti ala na terê ti gbata ni. Jérémie atene na Sédécias, atene: ‘Jéhovah atene tongana mo zia terê ti mo na maboko ti azo ti Babylone, mo na azo ti gbata ti mo kue ayeke sö kuâ. Me tongana mo ke, azo ti  Babylone ayeke gbi Jérusalem nga ala yeke gbu mo ti gue na mo na ngbâa.’ Sédécias atene: ‘Mbi ye ti zia terê ti mbi na ala ape!’

Ngu oko na ndambo na pekoni, aturugu ti Babylone akungbi agbagba ti Jérusalem na sese na ala bi wâ na yâ ti gbata ni. Ala gbi temple ni, ala fâ gbâ ti azo na ala mû ambeni mingi ague na ala na ngbâa.

Sédécias alondo na Jérusalem akpe ahon, me azo ti Babylone atomba peko ti lo. Ala gbu lo nduru na gbata ti Jéricho na ala gue na lo na Nébucadnezzar. Gbia ti Babylone amû yanga si a fâ amolenge ti Sédécias ti koli na lê ti lo Sédécias ni. Na pekoni, Nébucadnezzar abuba lê ti Sédécias na lo bi lo na da ti kanga, kâ la si lo kui na pekoni. Me Jéhovah amû zendo na azo ti Juda, lo tene: ‘Tongana a sara ngu 70 na pekoni, mbi yeke kiri na ala na Jérusalem.’

Nyen la ayeke si na amaseka so a gue na ala na ngbâa na Babylone? Eskê ala yeke ngbâ ande be-ta-zo na Jéhovah la?