යූදා රාජ්‍යයේ අය දිගින් දිගටම යෙහෝවා දෙවිට අකීකරු වෙලා බොරු දෙවිවරුන්ට නමස්කාර කළා. යෙහෝවා දෙවි අවුරුදු ගාණක්ම හුඟක් අනාගතවක්තෘවරුන්ව එවලා එයාලට උදව් කරන්න හැදුවත් එයාලා ඇහුම්කන් දුන්නේ නැහැ. එයාලා අනාගතවක්තෘවරුන්ට විහිළු කළා.

බැබිලෝනියේ නෙබුකද්නෙෂර් රජ රටවල් එකින් එක අල්ලගන්න පටන්ගත්තා. එයා යෙරුසලමත් අල්ලගෙන යෙහෝයාකිම් රජුවයි අධිපතීන්වයි යුද්ධයට දක්ෂ අයවයි කර්මාන්තකරුවන්වයි බැබිලෝනියට අරන් ගියා. දේවමාලිගාවේ තිබුණු වටිනා හැම දේමත් අරන් ගියා. ඊටපස්සේ එයා යූදා දේශයේ රජු විදිහට ශෙදකියාව පත් කළා.

මුලදී ශෙදකියා නෙබුකද්නෙෂර් රජුට කීකරු වෙලා හිටියා. ඒත් ළඟ හිටිය ජාතීන්වල අයයි බොරු අනාගතවක්තෘවරුයි ශෙදකියාට කිව්වා ‘බැබිලෝනියේ රජුට විරුද්ධව කැරලිගහන්න’ කියලා. යෙරෙමියා මෙහෙම කිව්වා. ‘එහෙම කළොත් යූදා දේශයේ හුඟක් අය මැරෙයි. සාගත, වසංගත එයි.’

ශෙදකියා අවුරුදු අටක් රජකම් කළාට පස්සේ එයා බැබිලෝනිවරුන්ට විරුද්ධව කැරලිගහන්න පටන්ගත්තා. ඒකට ඊජිප්තු හමුදාවේ උදව්වත් ගත්තා. බැබිලෝනිවරු ඇවිත් යෙරුසලම වටේ කඳවුරු ගහගත්තා. ඒ වෙලාවේ යෙරෙමියා ශෙදකියාට මෙහෙම කිව්වා. ‘යෙහෝවා දෙවි කියනවා ඔයා බැබිලෝනියට යටත් වුණොත් ඔයයි නගරයයි බේරෙයි කියලා. එහෙම කළේ නැත්නම් බැබිලෝනිවරු නගරය විනාශ කරලා ඔයාව හිරකාරයෙක් විදිහට අරන් යයි’ කියලත් කිව්වා. එතකොට ශෙදකියා කිව්වා ‘මං යටත්වෙන්නේ නෑ’ කියලා.

 අවුරුදු එකහාමාරකට පස්සේ බැබිලෝනිවරු යෙරුසලමේ ලොකු තාප්ප කඩලා මුළු නගරෙම ගිනි තිබ්බා. හුඟක් අයව මැරුවා. දහස් ගාණක්ව හිරකාරයෝ විදිහට අරන් ගියා.

ශෙදකියා යෙරුසලමෙන් පැනලා ගියත් බැබිලෝනිවරු එයා පස්සෙන් ගිහින් යෙරිකෝව ළඟදී එයාව අල්ලගෙන නෙබුකද්නෙෂර් ළඟට අරන් ගියා. බැබිලෝනියේ රජ ශෙදකියා බලන් ඉද්දීම එයාගේ පුතාලව මරලා එයාගේ ඇස් අන්ධ කරලා හිරේට දැම්මා. පස්සේ එයා හිරේදිම මැරුණා. ඒත් යෙහෝවා දෙවි යූදා දේශයේ අයට කිව්වා ‘අවුරුදු 70කට පස්සේ මං ඔයාලව ආයෙත් යෙරුසලමට එක්කන් යනවා’ කියලා.

බැබිලෝනියට අරන් ගිය යෞවනයන්ට මොනවා වෙයිද? එයාලා දිගටම යෙහෝවා දෙවිට කීකරුව ඉඳියිද?