Yihudu manni duucha hige Yihowa agure kaphu maganna magansiˈrino. Yihowa insa lowo diro kaaˈlanni keeshshino. Isi qorowisiissannonsa gede lowo masaalaano soyino; insa kayinni masaalaano yitannore macciishsha gibbino. Insa masaalaano qacifattino. Yihowa insa kaphu maganna magansidhannota hoolinohu hiittoonniiti?

Baabiloonete moote Nabukadanatsoori sunu sununni Yihudu gaˈre qafade adhi. Umo Yerusaalamete katama qafade adhi yannara, Moote Iyoaaqeemi, roorroota, olamaasinenna angate ogimma noonsare baala Baabiloone haaˈre haˈrino. Qoleno Yihowahu qullaawu mini giddo noo uduunne baala adhe haˈrino. Hakkiinni Nabukadanatsoori, Sedeqiyaasi Yihudu moote assino.

Umi qara, Sedeqiyaasi Nabukadanatsoorira hajajamino. Kayinni qooxeessisira heedhanno daganna kaphu masaalaano, Sedeqiyaasi Baabiloonete finqilanno gede amaaltusi. Ermiyaasi Sedeqiyaasi togo yee qorowisiisino: ‘Baabiloonete mootera hajajama giwittoro, Yihudu gobbara hudenna dhibbu batiˈranno; qoleno lowo manni reyanno.’

Sedeqiyaasi sette diro moohi gedensaanni, Baabiloonete mootera finqili. Isi Gibitsete olanto ‘Kaaˈleˈˈe’ yii. Hakkiinni Nabukadanatsoori Yerusaalame qassara olantosi soyi; olantono katama doyissitu. Ermiyaasi Sedeqiyaasira togo yii: ‘Yihowa, “Baabiloonete anga uyittoro atino gatatto, kuni katamino digiiramanno. Anga aa giwittoro kayinni Baabiloonete olanto konni katamira giira qassanno; ateno qafadde haadhe hadhannohe” yiino.’ Sedeqiyaasi kayinni ‘Anga dieemmo’ yii.

 Mittu dirinna lewu agani gedensaanni, Baabiloonete olanto Yerusaalamete huxxa diigge eˈe, katamaho giira qassu. Insa qullaawa mineno giirtino; lowo manna shitino, hattono lowo kume ikkanno manna qafadde adhite hadhino.

Sedeqiyaasi Yerusaalametenni fule xooqi; kayinni Baabiloonete olanto iso shorritanni hadhu. Insa iso Iyyaarkote yinanniwa iillite amadde Nabukadanatsooriwa massitu. Baabiloonete moote, Sedeqiyaasi laˈˈanna oososi shinanni gede assi. Hakkiinni Nabukadanatsoori Sedeqiyaasira illesi fushshine hunanni gede asse, usuru minira eessino; gedensoonni Sedeqiyaasi usuru mine heeˈre reyino. Ikkollana Yihowa Yihudu dagara togo yii: ‘Lamalawu diri gedensaanni gobbaˈne Yerusaalame higginanni gede asseemmo.’

Qafande Baabiloone haaˈne haˈnoonniri aja ooso hiikkituyya? Insa Yihowara ammanantino?