Niala tamy Jehovah vahoaky ta Joda tao reo tanatini-tao maro sady nivavaky amy ndranahary diso. Nanampy an-drozy avao Jehovah ndre nataon-drozy matetiky aza raha zay. Naniraky mpaminany maro ie mba handrara an-drozy. Fe tsy nijanjy rozy, fa vomaiky nikizakizahin-drozy mpaminany rey. Ino ty nataoni-Jehovah?

Nandresy firenena maro Nebokadnezara mpanjakani-Babylona tamy fotoa zay. Lafa naharesy ani-Jerosalema ie, le nandesiny a Babylona any Joiakina Mpanjaka, noho ty andriana, miaraky amy ty maramila noho ty mpanao asa tana. Nalany koa ty hanana iaby tamy tempolini-Jehovah tao. Bakeo nataony mpanjakani-Joda Zedekia.

Nanoriky ze raha nivolanini-Nebokadnezara tse Zedekia, tamy voalohany. Nampirisiky ani-Zedekia hizizo amy Babylona ty mpaminany sandoky noho ty firenena marìny an-drozy mbeny. Fe nivola taminy Jeremia hoe: ‘Laha mizizo eo iha, le ho maty olo reo sady hisy mosary noho arety koa ty a Joda etoa.’

Lafa feno valo tao ty nanjakani-Zedekia, le nizizo tamy Babylona ie. Nila fanampea tamy maramila Ejipsianina reo ie. Nirahini- Nebokadnezara hanafiky ani-Jerosalema maramilany rey, le nataon- drozy arosaro tanà iny. Le hoy Jeremia tamy Zedekia: ‘Nivola Jehovah fa laha maneky ho resini-Babylona iha, le tsy ho maty, sady tsy ho rava tanà toy. Fa laha tsy zay, le horoani-Babylonianina reo Jerosalema sady hataon-drozy gadra amin-drozy any iha.’ Namaly Zedekia hoe: ‘Tsy haneky ho resy zao aho!’

 Tao raiky noho tampany tafarani-zay, le nakomakini-maramila Babylonianina rey ty lakorovato niaro ani-Jerosalema. Lafa nitafilitsy ao rozy, le noroan-drozy tanà iny. Nimay koa tempoly iny, sady maro ty olo nivonoan-drozy, le olo an’arivony ro nandesin-drozy ho gadra amin-drozy any.

Nilay baka a Jerosalema ao Zedekia fe nihianini-Babylonianina rey. Nitratsin-drozy ie lafa narìny ani-Jeriko, le nandesin-drozy amy Nebokadnezara any. Nivonoani-mpanjakani-Babylona iny talohani- Zedekia teo anakilahiny rey. Bakeo nipotsehin-drozy ty masony, le nigadran-drozy ie. Nimaty tam-pigadrà tao ie tafara tatoy. Fe nampitamà ani-vahoakini-Joda reo Jehovah hoe: ‘Handesiko moly a Jerosalema any nareo lafa afaky 70 tao.’

Hanao akory anakajà nandesy a Babylona any rey? Tsy hivaliky amy Jehovah mihintsy va rozy?