LES 58
Yerusalem e kisi pori
Ibri leisi baka den sma fu Yuda ben e gowe libi Yehovah fu go anbegi falsi gado. Furu yari langa Yehovah pruberi fu yepi den. A seni furu profeiti fu warskow den, ma den no ben wani arki. Na presi fu dati den ben e spotu den profeiti. Fa Yehovah strafu den fu di den ben e anbegi falsi gado?
Nebukadnesar, a kownu fu Babilon ben e teki ala den kondre abra na ini a kontren dati. A fosi leisi di a teki Yerusalem abra, a tyari Kownu Yoyakin, den granman, den bun fetiman nanga den sma di ben e meki moimoi sani, go na Babilon. A teki ala den gudu na ini a tempel fu Yehovah tu. Ne Nebukadnesar meki Sedekia tron kownu fu Yuda.
Na a bigin, Sedekia ben e arki Nebukadnesar. Ma wan tu kondre nanga wan tu falsi profeiti taigi Sedekia taki a no musu du san Babilon e taki. Yeremia ben warskow Sedekia. A taigi en: ’Efu yu no du san Babilon taki, dan a pipel o dede. Feti-owru, angri, nanga siki o kiri den.’
Baka di Sedekia ben de kownu aiti yari, a bigin trangayesi a kownu fu Babilon. A go suku yepi na a legre fu Egepte. Ne Nebukadnesar seni en legre fu go feti nanga Yerusalem. A legre ben lontu a heri foto. Yeremia taigi Sedekia: ’Yehovah taki dati efu yu gi yusrefi abra na Babilon, noti no o pasa nanga yu èn a foto no o kisi pori tu. Ma efu yu no du dati, den Babilonsma o bron Yerusalem èn den o tyari yu gowe leki strafuman.’ Sedekia taki: ’Mi no o gi misrefi abra!’
Baka wán nanga afu yari, a legre fu Babilon broko a skotu fu Yerusalem, dan den bron a heri foto. Den bron a tempel, den kiri furu sma èn den tyari dusundusun sma gowe leki strafuman.
Sedekia lowe gowe fu Yerusalem, ma den Babilonsma go na en baka. Den kisi en krosibei fu Yerikow, ne den tyari en go na Nebukadnesar. A kownu fu Babilon meki sma kiri den manpikin fu Sedekia leti na en fesi. Baka dati Nebukadnesar breni Sedekia èn den poti en na ini strafu-oso. Drape a dede bakaten. Ma Yehovah ben pramisi den sma fu Yuda: ’Baka 70 yari, mi o tyari unu go baka na un kondre Yerusalem.’
San ben o pasa nanga den yongusma di den Babilonsma tyari gowe leki strafuman? Den ben o tan du san Yehovah taki?
„Yehovah Gado na Almaktiwan, sma kan frutrow den wèt fu yu èn den reti.”—Openbaring 16:7
Kande yu lobi den tori disi tu
SAN NA A BOSKOPU FU BIJBEL?
Bun kownu nanga ogri kownu
Fa a du kon taki Israel prati na ini tu kownukondre?
SAN NA A BOSKOPU FU BIJBEL?
Gado e taki nanga yepi fu en profeiti
Sortu boskopu Gado meki den profeiti fu en tyari gi sma? Luku fo boskopu di den ben tyari.
