Xa̱bu̱ xuajen Judá nitsingumijnaʼ mbaʼa nuthu náa Jeobá ga̱jma̱a̱ ndiyamajkhún xándú, o xóo muʼthá ndiyamajkhún eʼwíínʼ dioses bi̱ ragájkhun. Xúgíʼ tsiguʼ rúʼko̱, Jeobá nindoo rí mambáñún ikha jngó nikuʼmiin mbaʼin gaʼyee. Mú xa̱bu̱ túnimbu̱u̱n ga̱jma̱a̱ nitsijmiin. Jeobá nindoo rí maʼni gámbóo rí nduyamajkhún xándú. Mú xú káʼnii gáʼni xá.

Rey ndrígóo Babilonia, bi̱ mbiʼyuu Nabucodonosor, ni̱jkha̱ ragruigú mámbá xuajen. Timbá aphu rí nito̱ʼo̱o̱ náa Jerusalén, nigujtuwiin rey Joaquín, ga̱jma̱a̱ príncipes, ma̱ngaa guerreros, artesanos, ga̱jma̱a̱ ni̱jkha̱ kagui̱i̱n náa Babilonia. Ma̱ngaa ni̱jkha̱ kagu̱u̱ tesoro dí rígá náa templo ndrígóo Jeobá. Nda̱wa̱á , Nabucodonosor niʼthí dí Sedequías mani̱ndxu̱u̱ rey náa Judá.

Nákha ginii, rey Sedequías naʼnimbo̱o̱ kaʼyoo Nabucodonosor. Mú gaʼyee bi̱ nuni nduwaʼ ga̱jma̱a̱ xa̱bu̱ xuajen bi̱ kuwa mijngii nutháán Sedequías rí xáʼnimbo̱o̱ kaʼyoo rey ndrígóo Babilonia. Jeremías niʼthún: “A mu tsetatsimbaaʼ, makhañún xa̱bu̱, marigá ewiʼ ga̱jma̱a̱ nandii náa Judá”.

Nda̱wa̱á rí migiñuʼ tsiguʼ, rey Sedequías nánguá niʼnimbo̱o̱ kaʼyoo rey ndrígóo Babilonia, mú maʼni rúʼko̱ ninda̱ʼa̱ rí mixtambáyii náa ejército ndrígóo Egipto. Ikhú, Nabucodonosor nikunguinʼ ejército mu muni gámbáa Jerusalén. Ejército babilonio nigi̱ʼi̱i̱n náa rexo̱o̱ xuajenʼ. Jeremías niʼthúu̱n Sedequías: “Jeobá naʼthí á mu natatsíñaminaʼ náa inún babilonios, ikháánʼ gajmiáanʼ xa̱bu̱ makáwíin. Mú a mu nánguá etatsiñaminaʼ, ikhiin mutsikha̱a̱ Jerusalén ga̱jma̱a̱ magún ku̱ña̱a̱n guʼwá e̱jua̱nʼ”. Sedequías niriʼña: “¡Xaniʼñáminaʼ!”.

 Mbá tsiguʼ tikhu nda̱wa̱á, babilonios nini gámbáa mbá chíʼgíʼ xtátsí ndrígóo Jerusalén. Ikhí nitu̱ʼu̱u̱n náa xuajen ga̱jma̱a̱ nitsikha̱a̱. Ma̱ngaa nitsikha̱a̱ templo, niradíin mbaʼin wéñuʼ xa̱bu̱ ga̱jma̱a̱ mbaʼin nigu kudiin guʼwá e̱jua̱nʼ.

Sedequías niʼngo̱o̱ nigájnuu ragáyúu náa Jerusalén, mú babilonios nigún ruxkáá, ga̱jma̱a̱ nirugua̱a̱ náa mijngii Jericó ga̱jma̱a̱ nigún ku̱ya̱a̱ náa rey Nabucodonosor. Ikhú rey naʼniu tsiakii Sedequías mú mbaʼyoo xú káʼnii eradíin e̱ji̱i̱n. Ma̱ngaa, niʼni rí xakruigo̱o̱ ga̱jma̱a̱ nikudaaʼ guʼwá e̱jua̱nʼ. Ikhí nikháñu Sedequías. Mú Jeobá nixná ajngóo náa xa̱bu̱ xuajen Judá: “Nda̱wa̱á rí ganújngoo 70 tsiguʼ, matangáan kagui̱i̱n náa nikuwa náa Jerusalén”.

Ndiéjunʼ gaguáʼniin jiáma bi̱ ni̱jkha̱ kiʼdiin náa Babilonia rá. Lá maguajún jmbu má xúʼko̱ náa Jeobá xá.