Mateteke niala tamy i Jehovah naho nanompo andrianagnahare hafa ty vahoa i Joda. Nagnampe iareo avao ty Jehovah tagnate ty taogne maro. Nandefa mpaminany maro reke hampitao iareo, faie ndra kiniza iareo. Akore ty natao i Jehovah tamy izay?

Maro ty firenena fa nirese i Nebokadnezara mpanjaka i Babylona. Tamy ty fanafiha’e i Jerosalema voaloha’e, le tsinepa’e ty Joiakina Mpanjaka, ty mpifehe’e, ty mpiali’e naho ty ndaty mpanao asa tagnagne, le nente’e ta Babylona tagne iaby. Nindese’e iaby ka ze fanake tamy ty tempoly i Jehovah tao, le i Zedekia ty natao’e mpanjaka i Joda.

Nankatò i Nebokadnezara hey ty Zedekia tamy ty voaloha’e. Faie nivalike reke naho fa nagnorike ty heve ty mpaminany sandoke naho ty firenena narine iareo. Nampitao aze ty Jeremia tie: ‘Hisy vonoagne ndaty, keré naho aretegne ty a Joda eto naho mivalike rehe.’

Valo taogne tafara ty nanjakà i Zedekia, le nanohetse i Babylona reke sady nangatake ty maramila i Ejipta hagnampe aze. Nandefa maramila hanafike i Jerosalema ty Nebokadnezara. Nihodidìgne iareo i tanàgney. Hoe ty Jeremia tamy i Zedekia: ‘Ho avotse rehe naho ty tanàgne toy, naho manese vatagne amo o Babylonianao. Fa naho tsy izay, le hogadrae’e rehe sady horoa iareo ty Jerosalema.’ Hoe ty Zedekia: ‘Tsy hanao izay raho!’

 Tao’e raike mahery tafara izay, le sinimba o Babylonianao naho noroa iareo ty tanà i Jerosalema naho i tempolỳ. Maro ka ty ndaty vinono iareo naho ginadra’e.

Nilay ty Zedekia faie niheagne o Babylonianao. Nitrà iareo reke naho fa narine i Jeriko, le nente iareo mbamy i Nebokadnezara mbeo. Nampagnenté i mpanjaka i Babylonay i Zedekia ty namonoagne i ana’e rey. Nipirite i Nebogadnezara ka ty maso i Zedekia sady mbe ginadra’e reke, hafara’e nimate tao. Faie nampitamàe i Jehovah ty vahoa i Joda tie: ‘Naho fa afake 70 taogne, le hampolieko a Jerosalema agne nareo.’

Ino ty raha niseho tamy ty tanora nindesegne ho ndevo ta Babylona agne? Tsy nivalike tamy i Jehovah vao iareo?