Kwazyiindi zyiingi, maJuda bakali kuleka kukomba Jehova alimwi bakali kukomba baleza bakubeja. Kwaminyaka myiingi, Jehova wakali kweezya kubagwasya. Wakatuma basinsimi bakwe kuti bakabachenjezye, pesi taakwe nibakabaswiilila. Pesi bakali kubaseka basinsimi. Jehova wakakumaninsya biyeni kukomba baleza bakubeja nkubakali kuchita?

Mwaami wakuBbabbiloni, Nebbukkadinezari, wakali kuzunda zisi zyiingi. Naakazunda muunzi waJerusalemu kakusaanguna, wakatola Mwaami Jehoyakkini, baalumi bapati bamumuunzi, basilumamba abantu bakali kuchita milimu isiyene-siyene kubuzike kuBbabbiloni. Alubo, wakabweza zintu zyoonse zyakali kubelesegwa mutempele lyaJehova. Mpawo, Nebbukkadinezari wakabikka Zedekkiya kuti abe mwaami waJuda.

Kumatalikilo, Zedekkiya wakali kulibombya kuli Nebbukkadizari. Pesi zisi zyakali afwiifwi amuunzi waJerusalemu abasinsimi bakubeja, bakasungwaazya Zedekkiya kuti apapile mwaami wakuBbabbiloni. Jeremiya wakamuchenjezya kuti: ‘Ikuti wapapila mwaami wakuBbabbiloni, muyoojayigwa alimwi kuyooba nzala amalwazi muchisi chaJuda.’

Nikwakiinda minyaka iili 8 kali kweendelezya, Zedekkiya wakayeeya kuti apapile mwaami wakuBbabbiloni. Wakakumbila kugwasigwa abasilumamba bakuEgepita. Mpawo, Nebbukkadinezari wakatuma basilumamba bakwe kuti bakalwane muunzi waJerusalemu alimwi nibakasika bakakkala kabazyungulukide muunzi waJerusalemu. Jeremiya wakabuzya Zedekkiya kuti: ‘Jehova waamba kuti weelede kulekela mwaami wakuBbabbiloni kuti abweze muunzi, nkaambo kuti wachita oobo muyoofutulwa amuunzi wanu. Pesi kuti mwaleka kuchita oobu muunzi  waJerusalemu uyoonyonyoonwa alimwi bayoomutola kubuzike.’ Zedekkiya wakati: ‘Tandikoozumizya mwaami wakuBbabbiloni kuti abweze muunzi!’

Nikwakiinda munyaka achisela, basilumamba bakuBbabbiloni bakadilisya miduli yamuunzi waJerusalemu alimwi bakawutenta amulilo. Bakawumpa tempele akujaya bantu biingi alimwi bantu biingi bakatolwa kubuzike.

Zedekkiya wakachija kuzwa muJerusalemu, pesi basilumamba bakuBbabbiloni bakamwaandila. Bakamujatila afwiifwi akuJerikko alimwi bakamutola kuli Nebbukkadinezari. Mwaami wakuBbabbiloni wakajaya bana baZedekkiya kalangide. Kuzwa waawo, Nebbukkadinezari wakagwisya Zedekkiya meso alimwi wakamubikka muntolongo mwakazoofwida. Pesi Jehova wakasyomezya maJuda kuti: ‘Kwayinda minyaka iili 70, ndiyoochita kuti mukabweede kuJerusalemu.’

Niinzi chakali kuyoochitika kubana bachikula bakatolwa kubuzike kuBbabbiloni? Bakali kuyookkala kabasyomeka na kuli Jehova?