Planti taim ol manmeri bilong Juda i lusim Jehova na lotuim ol giaman god. Inap planti yia, Jehova i wok yet long helpim ol. Em i salim planti profet long givim tok lukaut long ol, tasol ol i no harim tok, nogat. Ol i tok bilas long ol profet. Hau Jehova i pinisim pasin bilong ol long lotuim ol imis?

King bilong Babilon, em Nebukatnesar, i wok long pait na kisim wan wan kantri. Fes taim em i pait na kisim Jerusalem, em i holimpasim King Jehoiakin, ol prins, ol strongpela soldia, na ol saveman bilong wokim ol samting, na kisim olgeta i go long Babilon. Na tu, em i kisim olgeta gutpela samting long tempel bilong Jehova. Bihain Nebukatnesar i makim Sedekaia i kamap king long Juda.

Pastaim, Sedekaia i bihainim tok bilong Nebukatnesar. Tasol ol narapela lain i sindaun klostu na ol giaman profet i givim edvais long Sedekaia long bikhet long Babilon. Jeremaia i givim tok lukaut long em: ‘Sapos yu bikhet, bai i gat ol man i dai long bainat, bikpela hangre, na ol bikpela sik long Juda.’

Bihain long Sedekaia i stap king inap 8-pela yia, em i wokim disisen long bikhet long Babilon. Em i askim ami bilong Isip long helpim em. Bihain Nebukatnesar i salim ami bilong em i go bilong pait long Jerusalem, na ol i wokim kem raunim taun. Jeremaia i tokim Sedekaia: ‘Jehova i tok sapos yu putim yu yet long han bilong Babilon, orait yu na dispela taun bai i no inap bagarap. Tasol sapos yu bikhet, ol Babilon bai kukim Jerusalem na kisim yu olsem kalabusman.’ Sedekaia i tok: ‘Mi no laik putim mi yet long han bilong Babilon!’

 Bihain long wan na hap yia, ami bilong Babilon i brukim banis bilong Jerusalem na kukim taun. Ol i kukim tempel, kilim i dai planti man, na kisim planti tausen kalabusman.

Sedekaia i ranawe lusim Jerusalem, tasol ol Babilon i ran bihainim em. Ol i holimpasim em klostu long Jeriko na bringim em i go long Nebukatnesar. King bilong Babilon i mekim Sedekaia i lukluk i stap taim ol i kilim i dai ol pikinini man bilong em. Bihain Nebukatnesar i mekim Sedekaia i kamap aipas na putim em long kalabus, na Sedekaia i dai long dispela hap. Tasol Jehova i bin tok promis long ol manmeri bilong Juda: ‘Bihain long 70 yia, mi bai bringim yupela i kam bek long ples bilong yupela long Jerusalem.’

Wanem samting bai painim ol yangpela man ol i bin kisim olsem ol kalabusman i go long Babilon? Yu ting ol bai stap gut yet long Jehova?