Иуданың чону чаңгыс эвес удаа Иеговадан хая көрнүп, меге бурганнарга чүдүп турган. Иегова оларга хөй чылдар ишти дузалажып, медээчилерин чоргузарга-даа, олар дыңнавас болган. Харын-даа олар медээчилерни кочулап, дорамчылап турганнар. Иегова чүнү кылган?

Вавилоннуң хааны Навуходоносор күрүнелерни эжелеп-ле турган. Ол бир дугаар Иерусалимни тиилээш, Вавилонче Иехония хаанны, нояннарны, дайынчыларны база дарган кижилерни кулданыгже аппарган. Оон ыңай ол Иегованың өргээзинде эртине-байлакты ап алгаш, Седекияны хаан кылдыр томуйлап каан.

Эгезинде Седекия Навуходоносорнуң аайындан эртпейн турган. Оон кожазында чоннар база меге медээчилер Седекияны Вавилонга удур тура халыыр кылдыр көгүдүпкен. Иеремия Седекияга: «Вавилонче халдаар болзуңза, Иудага өлүрүүшкүннер, аш-чут база аарыг-аржык болур» — деп сагындырган.

Сес чыл эрткенде, Седекия Вавилонче дөмей-ле халдаар деп шиитпирлээш, Египеттен дуза дилээн. Ынчан Навуходоносор Иерусалимни долгандыр бүзээлээр кылдыр аг-шериин чоргузупкан. Иеремия Седекияга Иегованың сөстерин дамчыткан: «Вавилонга дүжүп бээр болзуңза, бодуңну болгаш хоорайны камгалап алыр сен. А удурланыр болзуңза, олар Иерусалимни өрттедипкеш, сени кулданыгже аппаар». Ынчалза-даа Седекия: «Дүжүп бербес мен!» — деп харыылаан.

 Бир чыл алды ай чартык эрткенде, вавилончулар Иерусалим хоорайның ханаларын бузуп каапкаш, өрттедипкеннер. Олар өргээни база өрттеткеш, хөй кижилерни өлүргеш, муң-муң улусту кулданыгже аппарган.

Седекия Иерусалимден дезип четтигипкен. Ынчалза-даа вавилончулар ону Иерихоннуң чанынга тудуп алгаш, Навуходоносорга эккелген. Хаан Седекияның мурнунга ооң оолдарын өлүрүп каапкан. Ооң соонда ол Седекияны согурарткаш, кара-бажыңче октапкан. Үе эрткенде, ол өлүп калган. Ынчалза-даа Иегова иудей чонга аазаан: «70 чыл болгаш, Иерусалимче силерни чандырыптар мен».

Иехония хаан-биле катай кулданыгже алгаш барган элээди оолдар-биле чүү болган? Олар Иеговага шынчы арткан бе?