Te lum yuʼun Judá bayal buelta la yijkʼitayik te Jehová sok kaj schʼuunik lokʼombaetik, jaʼ ya skʼan ya yal te kaj yichʼik ta mukʼ lotil diosetik. Te jayeb jaʼbil jich la spasike, te Jehová la skʼan skoltaylan jich yuʼun la stikun bayal ta tul j-alwanejetik. Pero te ants winiketik maba la yichʼik ta wenta te j-alwanejetik sok la slabanik. Te Jehová la skʼan slajin te schʼuunel lokʼombaetike. ¿Binwan-utʼil ya spas?

Te Nabucodonosor te ajwalil yuʼun Babilonia, yak ta yochintayel te jujunpam lume. Te sbabial buelta la yochintay te Jerusalén, la stsak bael te ajwalil Joaquín, te principaletik, winiketik yuʼun guerra sok te machʼatik pʼijubenik ta spasel aʼteliletik, la yikʼtiklan bael ta Babilonia. Jaʼnix jich la yichʼ bael te kʼulejalil te ay ta templo yuʼun Jehová. Ta patil, te Nabucodonosor la yotses ta ajwalil yuʼun Judá te Sedequías.

Ta sjajchibal, te ajwalil Sedequías ya schʼuunbey skʼop-a te Nabucodonosor. Pero te lotil j-alwanejetik sok te ants winiketik te ayik ta yantik lum te nopol yiloj sbaik soke, la yalbeyik te Sedequías te akʼa skʼaxuntaybey smantal te ajwalil yuʼun Babilonia. Te Jeremías jich la sjultesbey yoʼtan: “Teme ya akʼaxuntay te kʼope, yame xtal lajel, wiʼnal sok bayal chamel ta Judá”.

Te kʼalal kʼaxemix waxakeb jaʼbil-ae, te ajwalil Sedequías la skʼaxuntaybey smantal te Babilonia, jaʼ yuʼun la skʼanbey koltayel te soldadoetik yuʼun Egipto. Jich yuʼun te Nabucodonosor la stikun soldadoetik ta yochintayel te Jerusalén. Te soldadoetik yuʼun Babilonia la yakʼ skampamentoik ta sjoyobal te lume. Te Jeremías la yalbey te Sedequías: “Te Jehová ya yal teme ya awakʼ aba ta skʼab te  babilonioetike, te jaʼat sok te lume maba ya awichʼik lajinel. Pero teme ma jichuk ya apase, yame schikʼik te Jerusalén sok yame awichʼ chukel bael”. Te Sedequías jich la sut: “¡Maba ya kakʼ jba ta stojol!”.

Jun jaʼbil sok olil ta patil, te babilonioetik la sjinik junuk parte te tsʼajkʼetik yuʼun te Jerusalén. Tey ochik-a, jich la schikʼik te lume. Jaʼnix jich la schikʼik te templo, la smilik bayal ants winiketik sok bayal ta mil la yichʼik chukel bael.

Te Sedequías lokʼnix ta anel, pero te babilonioetik la snutsik bael, la stsakik ta nopol Jericó sok la yikʼik bael ta stojol te Nabucodonosor. Te ajwalil la suj te Sedequías ta yilel bin-utʼil ya yichʼ milel te snichʼnabe. Ta patil la slokʼesbey sit sok la yotses ta karsel. Tey laj-a te Sedequías. Pero te Jehová jich la yal ta jamal ta stojol te lum Judá: “Te kʼalal ya xkʼax 70 jaʼbil yame kikʼex sujtel tal ta Jerusalén”.

¿Binwan ya xkʼot ta stojolik te jchʼiel keremetik te la yichʼik ikʼel bael ta Babiloniae? ¿Juntobal yoʼtan ya yakʼ sbaik ta stojol te Jehovae?