Atthu a oYuda yaahitthikela-tho omuhiya Yehova enaakokhorela amuluku eethiru. Mwa iyaakha sinceene, Yehova aahivikaniha waakhaliherya. Owo aahaaruma maprofeta manceene wira yaalopole, masi atthu awo khiyaawiriyana. Ohiya-vo, yaanaaveeha. Yehova aamala-malinhe sai okokhorela waya ilatarato?

Mwene a oBabilonia Nabukhodonosori, aahituphela ni okuxa ilapo soovirikana. Mukwaha woopacerya owo aaxinttale awe omwene wa oYerusalemu, aahinvara mwene Yoyakimi, anakhotto, makhulupale a oYerusalemu ni atthu ootheene a miruku, nto aahaaroiha oBabilonia. Owo aahikuxa mihakhu sotheene saari mutemplo mwa Yehova. Nabukhodonosori aahimukuxa Zedekiya khumukhaliha mwene a oYuda.

Wanipacerya Zedekiya aanimwiiwelela Nabukhodonosori. Masi maloko oowaattamela ni maprofeta oowootha yaahimutumererya Zedekiya omurukunuwela. Yeremiya aahimulopola so: ‘Mwamurukunuwela Nabukhodonosori, atthu anyu animwiiviwa, enookhumelela etala ni iretta elapo ya oYuda’.

Nuumala olamulela iyaakha 8, Zedekiya aahihiya omwiiwelela mwene a oBabilonia. Zedekiya aahaavekela anakhotto a wEjiitu wira emukhaliherye. Nuumala-vo, Nabukhodonosori aahaaruma anakhotto awe otuphela oYerusalemu, ni aahimaka mukerekhere mwa epooma ele. Yeremiya aahimuleela Zedekiya wira: ‘Yehova ohimmye wira, nyuwo mwaivahererya wa mwene a oBabilonia, khamuniiviwa, nave muttetthe ola khonipahiwa. Masi,  mwahitthune, muttetthe ola wa oYerusalemu onoopahiwa ni anakhotto a oBabilonia. Vano nyuwo munoovariwa-tho’. Zedekiya aahaakhula wira: ‘Nkiniivahererya!’

Nuuvira eyaakha emosa nnimeya, anakhotto a oBabilonia, yaahipwexa ixiri sa oYerusalemu ni yaahipaha epooma ele. Awosa yaahipaha etemplo, ni yaahiwiiva atthu anceene, nave akina yaahaavara ntoko ipottha.

Zedekiya aahitthyawa oYerusalemu, masi anakhotto a oBabilonia yaahimutthimakela. Awosa yaahinvara waattamela oYerikho ni yaahimuroiha wa Nabukhodonosori. Mwene owo a oBabilonia aahiruma wiiviwa anaawe Zedekiya tiithi aya aawehaka. Nuumala-vo, Nabukodonosori aahimukumiha maitho Zedekiya, khunwalela mukhatteya mpakha okhwa. Vano Yehova aahaaleiherya aYuda wira: ‘Savira iyaakha 70, miyo kinimoohokoloxeryani elapo anyu oYerusalemu’.

Exeeni yaarowa waakhumelela amiravo yaavariwe khuroihiwa oBabilonia? Niireke yanvikaniha okhala oororomeleya wa Yehova?