An katawohan han Juda pauroutro nga bumaya kan Jehova ngan nagsingba ha buwa nga mga dios. Ha sulod hin damu ka tuig, nangalimbasog hi Jehova nga buligan hira. Nagsugo hiya hin damu nga propeta basi pahamangnoan hira, pero waray hira mamati. Lugod, gintamay nira an mga propeta. Ano an ginbuhat ni Jehova basi umundang hira pagsingba ha buwa nga mga dios?

Damu na nga nasud an ginsakop ni Nabukodonosor nga hadi han Babilonya. Han siyahan nga nasakop niya an Jerusalem, ginbihag niya hi Hadi Jehoyatsin, an mga prinsipe, an mga sundalo, ngan an maabilidad nga mga trabahador, ngan gindara hira ha Babilonya. Iya liwat ginkuha an ngatanan nga bahandi ha templo ni Jehova. Katapos, ginhimo ni Nabukodonosor hi Sedekia nga hadi han Juda.

Ha tinikangan, nasugot hi Sedekia kan Nabukodonosor. Pero ginsagdonan hiya han kahirani nga mga nasud ngan han buwa nga mga propeta nga magrebelde ha Babilonya. Ginpahamangnoan hiya ni Jeremias: ‘Kon magrebelde ka, magkakaada pamatay, gutom, ngan sakit ha Juda.’

Katapos hin walo ka tuig nga paghadi ni Sedekia, nagrebelde hiya ha Babilonya. Nagpabulig hiya ha pwersa-militar han Ehipto. Salit ginsugo ni Nabukodonosor an iya kasundalohan nga atakehon an Jerusalem, ngan nagkampo hira ha gawas han syudad. Ginsidngan ni Jeremias hi Sedekia: ‘Nasiring hi Jehova nga kon masurender ka ha Babilonya, matatalwas ka pati an syudad. Pero kon diri, susunugon han mga taga-Babilonya an  Jerusalem ngan piprisuhon ka.’ Hi Sedekia nagsiring: ‘Diri ako masurender!’

Paglabay hin usa ngan tunga ka tuig, nabungkag han kasundalohan han Babilonya an mga pader han Jerusalem ngan ginsunog an syudad. Ginsunog nira an templo, ginpamatay an damu nga tawo, ngan yinukot an ira gindara sugad nga mga priso.

Nakapalagiw hi Sedekia ha Jerusalem, pero ginlanat hiya han mga taga-Babilonya. Nadakop nira hiya hirani ha Jerico ngan gindara kan Nabukodonosor. Iginpakita han hadi han Babilonya kan Sedekia han ginpatay an iya mismo mga anak. Kahuman, ginbuta ni Nabukodonosor hi Sedekia. Tapos, ginpriso hiya tubtob mamatay. Pero nagsaad hi Jehova ha katawohan han Juda: ‘Katapos hin 70 ka tuig, ibabalik ko kamo ha iyo lugar, ha Jerusalem.’

Ano daw la an mahitatabo ha mga batan-on nga gindara nga priso ngadto ha Babilonya? Magpapabilin daw la hira nga maunungon kan Jehova?