Mwakuwilisyawilisya, ŵandu ŵa ku Yuda ŵamlekaga Yehofa, ni kulambilaga milungu jaunami. Yehofa ŵajendelecele kwakamucisya jemanjajo kwa yaka yejinji. Jwatumile ŵakulocesya ŵajinji kuti akakalamusye ŵanduwo. Nambo ŵanduwo nganapikanilaga, m’malo mwakwe ŵanyosyaga ŵakulocesyawo. Ana Yehofa ŵamasisye camtuli ndamo jakulambila milungu jakupanganyidwa?

Nebukadinesala mwenye jwa ku Babulo, jwagomekaga yilambo. Paŵawugomece msinda wa Yelusalemu kandanda, jwalakwe ŵakamwile mwenye Yehoyakini, acimlongola, asilikali, soni ŵandu ŵakamula masengo gapayala, ni kwawula nawo ku Babulo. Jwajigelesoni cipanje cosope cacaliji m’nyumba jakulambilila ja Yehofa. Kaneko Nebukadinesala ŵam’ŵisile Sedekiya kuŵa mwenye jwa Ayuda.

Pandanda, Sedekiya ŵampikanilaga Nebukadinesala. Nambo mitundu jakuŵandikana soni ŵakulocesya ŵawunami, ŵamlimbikasyaga Sedekiya kwimucila Babulo. Yelemiya ŵamkalamwisye Sedekiya mwakumsalila kuti, ‘Naga mkutenda yeleyi, mu Yuda cimuŵe kuwulagana, sala soni yilwele.’

Sedekiya ali alamulile kwa yaka 8, ŵaganisisye yakwimucila msinda wa Babulo. Jwalakwe ŵaŵendile asilikali ŵa ku Iguputo kuti amkamucisye. Kaneko Nebukadinesala ŵatumisye asilikali ŵakwe kuti akasumule Yelusalemu, ni ŵataŵile masakasa gawo kusa kwa msindawo. Yelemiya ŵamsalile Sedekiya kuti, ‘Yehofa asasile kuti naga mkucenga nganisyo syenu syakwimucila Babulo, mmwejo soni msindawu ucikulupuka. Nambo naga ngamkutenda yeleyi, Ababulo cacijoca Yelusalemu soni mmwejo cacimjigalila ku ukayidi.’ Sedekiya jwatite, ‘Ngangusaka kucenga, cinjimucile basi.’

 Pali pamasile caka ni miyesi 6, asilikali ŵa Babulo ŵagumwile mapupa ga msinda wa Yelusalemu soni ŵawujocice moto. Ŵajocicesoni nyumba jakulambilila, kuwulaga ŵandu ŵajinji, soni ŵane ŵajigalile ku ukayidi.

Sedekiya ŵatisile ku Yelusalemu, nambo Ababulowo ŵam’wutwisye. Jemanjajo ŵamkamwile Sedekiya ciŵandika ni msinda wa Yeliko, kaneko ŵamjigalile kwa Nebukadinesala. Ni mwenyejo ŵalingenye yakuti Sedekiya akalilolele jika kuwulajidwa kwa ŵanace ŵakwe ŵacalume. Kaneko Nebukadinesala ŵamkolowele meso Sedekiya ni kum’ŵika mu ukayidi, mwamti jwawilile kukoko. Nambo Yehofa ŵatesile cilanga ni ŵandu ŵa ku Yuda mwakwasalila kuti, ‘Panyuma pa yaka 70, cinjim’wucisya jemanja ku Yelusalemu.’

Ana ŵanace ŵaŵajigalidwe kwawula ku ukapolo ku Babulo catendecele cici? Ana ŵajendelecele kuŵa ŵakulupicika kwa Yehofa?