U kajnáaliloʼob Judaeʼ yaʼab u téenel náachchajoʼob tiʼ Jéeoba ka joʼopʼ u adorartikoʼob maʼ jaajil diosoʼobiʼ. Tuláakal le tiempo jeʼeloʼ, Jéeobaeʼ tu túuxtaj profetaʼob utiaʼal u yáantkoʼob. Chéen baʼaleʼ le máakoʼoboʼ maʼ tu yuʼuboʼob le baʼax tu yaʼaloʼoboʼ, baʼaxeʼ tu sen aʼaloʼob baʼal tiʼ le profetaʼoboʼ. Jéeobaeʼ u kʼáat ka xuʼuluk u adorartikoʼob maʼ jaajil diosoʼobiʼ. ¿Bix túun ken u beetil?

Nabucodonosor u reyil Babiloniaeʼ táan kaʼach u chʼaʼik yaʼab kaajoʼob. Ka tu yáax chʼaʼaj u kaajil Jerusaleneʼ tu bisaj tu kaajil Babilonia rey Joaquín, le principeʼoboʼ, le soldadoʼoboʼ yéetel le máaxoʼob ku beetkoʼob jatsʼuts adornoʼoboʼ. Tu bisaj xan le baʼaloʼob koʼojtak yaan tu templo Jéeobaoʼ. Ka tsʼoʼokeʼ Nabucodonosoreʼ tu yaʼalaj Sedequías ken u beet u reyil tu luʼumil Judá.

Tu káajbaleʼ rey Sedequíaseʼ ku yuʼubik kaʼach u tʼaan Nabucodonosor. Chéen baʼaleʼ le maʼ jaajil profetaʼob yéetel le máaxoʼob kajaʼanoʼob teʼ luʼumiloʼob yaan naatsʼ Judaoʼ tu yaʼaloʼob tiʼ Sedequías ka u tsʼáauba tu contra u reyil Babilonia. Jeremíaseʼ tu yaʼalajtiʼ: ‹Wa ka bin tu contra Babiloniae‘, tu luʼumil Judaeʼ yaan u yantal wiʼijil, kʼojaʼaniloʼob yéetel kíimil›.

Ka máan ocho añoseʼ, Sedequíaseʼ tu kʼáataj ka áantaʼak tumen u soldadoiloʼob Egipto utiaʼal ka xiʼik tu contra Babilonia. Le oʼolal le rey Nabucodonosoroʼ tu túuxtaj u soldadoʼob utiaʼal u binoʼob baʼateʼel tu contra u kaajil Jerusalén. U soldadoiloʼob Babiloniaeʼ pʼáatoʼob kajtal junpʼéel tiempo tu baʼpach le kaajoʼ. Jeremíaseʼ tu yaʼalaj tiʼ Sedequías: ‹Jéeobaeʼ ku yaʼalikeʼ wa ka kʼubikaba tu kʼab le babilonioʼoboʼ, teech yéetel le kaajoʼ maʼ kan kíimleʼex. Wa maʼ ta beetkeʼ, letiʼobeʼ yaan u  tóokikoʼob u kaajil Jerusalén tsʼoʼoleʼ techeʼ yaan a bisaʼal kʼalbil›. Sedequíaseʼ tu núukaj: ‹¡Maʼ ken in kʼubinba!›.

Ka máan año y medioeʼ, u soldadoiloʼob Babiloniaeʼ tu jutoʼob junjaats tiʼ u baʼpakʼiloʼob Jerusalén. Tiʼ ookkoʼob utiaʼal u tóokikoʼob le kaajoʼ. Tu tóokoʼob xan le templooʼ, tu kíimsoʼob yaʼab máakoʼob yéetel u milesil bisaʼaboʼob Babiloniaiʼ.

Sedequíaseʼ béeychaj u jóokʼol tu kaajil Jerusalén, chéen baʼaleʼ chʼaʼpachtaʼab tumen le babilonioʼoboʼ. Letiʼeʼ maʼach naatsʼ tiʼ u kaajil Jericó, ka tsʼoʼokeʼ bisaʼab tiʼ le rey Nabucodonosoroʼ. Le reyoʼ tu beetaj u yilik Sedequías bix u kíimsaʼal u paalaloʼob. Tsʼoʼoleʼ tu beetaj u chʼóoptal yéetel u kʼaʼalal cárcel. Tiʼ kíim Sedequíasiʼ. Chéen baʼaleʼ Jéeobaeʼ tu beetaj junpʼéel promesa tiʼ u kajnáaliloʼob Judá: ‹Ken máanak 70 añoseʼ, yaan in sutkeʼex ta wotocheʼex yaan Jerusalenoʼ›.

¿Baʼax kun úuchul yéetel le táankelem paalal bisaʼaboʼob Babiloniaoʼ? ¿Yaan wa u seguer u chúukpajal u yóoloʼob tiʼ Jéeoba?