Stale biaje bixeleʼ ca binni de Judá que de Jiobá ne biʼniʼ adorarcaʼ dios falsu. Ca iza que, gucalaʼdxiʼ Jiobá ñacané laacabe ngue runi biseendaʼ stale profeta ra nuucabe. Peru qué nucaadiaga ca binni que laacabe ne laga biʼniʼ búrlacaʼ laacabe. Maʼ qué racalaʼdxiʼ Jiobá guni adorárcabe dios falsu. ¿Xi gúnibe yanna yaʼ?

Rey stiʼ Babilonia, Nabucodonosor, ziyuni ganar ca guidxi ra zidiʼdiʼ. Primé biaje biʼniʼ ganarbe Jerusalén, gunaazebe rey Joaquín, ca príncipe, ca hombre rié lu guerra, ca artesanu ne yenebe laacaʼ Babilonia. Laaca gucuaabe ca cosa risaca ni nuu ndaaniʼ templu stiʼ Jiobá. Despué, guníʼ Nabucodonosor maʼ Sedequías gaca rey stiʼ Judá.

Nacubi ga que, bizuubaʼ rey Sedequías stiidxaʼ Nabucodonosor. Peru ca profeta falsu ne ca binni de ca guidxi nuu gaxha que gúdxicaʼ Sedequías maʼ cadi guni ni ná rey de Babilonia. Gudxi Jeremías laabe: «Pa gucaaluluʼ Babilonia, zati stale binni, ziuu hambre ne zaca huará ca binni de Judá».

Xhono iza despué, bicaalú rey Sedequías Babilonia, ne gunábabe ejércitu stiʼ Egipto gacané laabe. Óraque biseendaʼ Nabucodonosor ejércitu stiʼ para gucaalú Jerusalén. Guluu ejércitu stiʼ Babilonia leʼ guidubi buelta guidxi que. Gudxi Jeremías Sedequías: «Jiobá ná pa gaca rendirluʼ nezalú ca babilonio zalaluʼ lii ne guidxi ca. Peru pa qué gaca rendirluʼ, zucaaguícabe Jerusalén, zinécabe lii ne zuseguyoocabe lii». Sedequías bicabi: «¡Qué zaca rendir diaʼ!».

 Ti iza arondaʼ despué, bisaba ca babilonio ti ndaa muru stiʼ Jerusalén, ladu que biuucaʼ ne bizaaquicaʼ guidxi que. Laaca bizaaquicabe templu que, biiticabe stale binni ne zinécabe stale mil de esclavu.

Gunda biree Sedequías de Jerusalén, peru yenanda ca babilonio que laabe, gunaazecaʼ laabe gaxha de Jericó ne yenecaʼ laabe ra nuu rey Nabucodonosor. Bicaa rey riʼ Sedequías guʼyaʼ modo biiticabe ca xiiñiʼ, óraque bisicheepabe lú ne biseguyoobe laa. Raqué guti Sedequías. Peru Jiobá biʼniʼ prometer ca binni de Judá: «Tiidiʼ si 70 iza, zabiguétatu ra lídxitu Jerusalén».

¿Xi gaca xa de ca joven ni zinécabe Babilonia yaʼ? ¿Zuzuubacabe stiidxaʼ Jiobá la?