Dedede, aboro Yuda anaambu Yekova na kini irisi kungbo ambori. Tipa dungu agarã, Yekova amangi ome tipa ka undo yo. Ko akedi dungu anebi tipa i za yo, ono ka i adeganga tuyo ya. Kuba gupai nga i nidegetuyo, i anaasawia anebi asawia. Ginipai Yekova amangihe ka nyasariipa gayo irisokpiahe?

Bakindo Babera, Nebukadenesara, atona ka zio aringara ti mburu kuraha. Ho ko azi Yerusarema ni ni bambataha, ko azi Bakindo Yoyakina, abazogo, abasovura, na abambakadiahe, ki ga na yo ku Babera yo. Ko arogo gu kikiipa ahe dũ naadu rogo ga Yekova bambu yo. Fuani, Nebukadenesara ki moi Zedekiya ni bakindo Yuda.

Ti tonatonaha, Zedekiya adu ni ruruko fu Nebukadenesara. Ono gu rikaaboro naadu mbembedi na Zedekiya gbiati ziree anebi aruguko ko samungu kuti Babera. Yeremaya aza ko nga: ‘Ka mo samungu, i nika imo aboro, ngbongi na akaza ki du vuru Yuda.’

Fuo Zedekiya zogorago tipa agarã muambe, ko adiberã ka samungu kuti Babera. Ko asana agu asekere nga ga Ezipeta yo i undo ko. Fuani, Nebukadenesara ki kedi gako asekere i ye ka zubo Yerusarema, na i ki ke gaha gbata kirikiri. Yeremaya aya fu Zedekiya: ‘Ya Yekova wẽ ka mo fu tiro ku be Babera, i aimongo ro na ki gbarasi gamo gbata te. Ono ka mo amanganga ha wo ya, aBabero nika zo Yerusarema na ki ga na mo ni zizi ro.’  Zedekiya ki ya: ‘Ka mi funga tire ku be yo te!’

Fuo garã sa na beberehe kusa, agu asekere nga ga Babera yo akua ndugu Yerusarema na ki zo gbata. I azo yekaru, ki imi dungu aboro, na ki ga na akutu yo ni zizi yo.

Zedekiya aoro vuru Yerusarema kusayo, ono aBabero ki do fuoko. I aziko mbembedi na Yereo na ki ye na ko fu Nebukadenesara. Bakindo Babera amoi Zedekiya ko nibi wai i aimo awiriko. Fuani, Nebukadenesara ki kofodi bangiri Zedekiya na ki moiko ku bambukiso yo, ko ki kpi kina koyo. Ono Yekova akido aboro Yuda nga: ‘Tingbafuo agarã 70, mi nika karaga roni ku Yerusarema yo.’

Ginipai si adu nga si nika manga gu paranga aboro i aga na yo ni zizi yo ku Babera yo? Ya mo i anye niruru yo fu Yekova?