PONJI MI 59
Awobi ang’wen ma giworo Yehova
Kinde ma Nebukadnezar ucoko dhanu ma pigi tek mi Yuda edok kugi i Babeli, eketho jego pare ma nyinge Acpanaz kara unen wigi. Nebukadnezar ung’olo ni Acpanaz nia elond awobi moko ma kumgi yot man ma wang’gi leng’ kud i kindgi. Awobi maeno jubiponjogi pi oro adek. Ponjine bikonyogi kara gidok jutic ma pigi tek i ker mi Babeli. Awobine jubiponjogi ku somo piny, ku kiewo kwan, man ku weco dhok mi Babeli. Ugam ukwayere nia gicam bende kit cam ma rom ku m’ubimo karacelo ku jego pare gicamu. Awobi ang’wen ne ubino Daniel, Hanania, Micael man Azaria. Acpanaz umio igi nying’ ma nyen mi Babeli: Beltecazar, Cadrak, Mecak man Abed-nego. Nyo ponji maeno ma ginwang’u uketho giweko nitimo ni Yehova?
Awobi ang’wen maeni gikeco migi niworo Yehova. Ging’eyo nia gicikiri ngo nicamu cam p’ubimo, pilembe Cik pa Yehova uyero nia kit camne moko ubino gin m’ucido. Pieno giyero ni Acpanaz kumae: ‘Timba kud iketh wacam cam p’ubimo.’ Acpanaz udwoko igi kumae: ‘Kan wucamu ngo man ubimo ubin uneno nia weng’wu ve wang’ ju m’utwoyo, ebinega!’
Daniel ugam unwang’u paru moko. E eyero ni ng’atu m’ubeneno wigi kumae: ‘Kan ecopere mii iwa kende kende dek ma col man pii pi nindo apar. I ng’eye, juporwa kud awobi ma camu cam p’ubimo.’ E ng’atu m’uneno wigi ugam uyio.
I ng’ei nindo apar, Daniel karacelo ku jurimbe adek kumgi bino leng’ nisagu awobi mange ceke. Anyong’a nego Yehova lee dit pilembe giwore. Bende emio rieko mi nyang’ i ginmawokiwang’ man mi koro the lek ni Daniel.
Kinde ma ponji ugam uthum, Acpanaz utero awobi maeno i wang’ Nebukadnezar. Ubimo uweco kugi man enwang’u nia Daniel, Hanania, Micael man Azaria gibino riek man ging’eyo lembe lee nisagu awobi mange ceke. Egam eng’io awobi ang’wen maeno pi nitimo tic i kal pare. Ubimo bibepenjogi pi ning’eyo lembe ma pigi tek. Yehova uketho gidoko riek nisagu jururieko ceke p’ubimo ku weg ajoga de ceke.
Kadok nwang’u gibino i ng’om mange de, re Daniel, Hanania, Micael man Azaria wigi wil ungo nia gitie dhanu pa Yehova. Nyo in de ibibepoi pi Yehova kadok nwang’u ibenweng’iri kaka ma junyodo peri gimbe i ie?
“Kud iyi ng’atu moko cei ya fodi i nyathin; ento dong’ ibed ni por mi ju m’uyio, i lembe, i bedo, i mer, i yioyic, i leng’cwiny.”—1 Timoteo 4:12
Nen bende
NWANG’ PONJI NIAI KUD I KPAWA MI BIBLIA
Gikwero nirum i ng’om
Cadrak, Mecak man Abed-nego gikwero nirwo ni ayi gin m’acwia mi mola ma kwar p’ubimo mi Babeli.
NWANG’ PONJI NIAI KUD I KPAWA MI BIBLIA
Daniel i odumvor
Bed irwo i bang’ Yehova, tap calu ma Daniel ubed utimo!
