Kɛ Nɛbikadnɛzali fali Zidafuɛ mun ɔli Babilɔnin’n, ɔ fa be mɛnnin i awlo lɔ sran dan kun mɔ be flɛ i Aspɛnazi’n naan ɔ nian be su. Nɛbikadnɛzali seli Aspɛnazi kɛ ɔ kpa gbanflɛn kanngan nga tukpacɛ nunman be wun’n nin be nga be si ngwlɛlɛ kpa’n, naan be kle be like afuɛ nsan. I liɛ’n, bé káci sran dan Babilɔnin famiɛn’n i awlo lɔ. Gbanflɛn kanngan sɔ mun bé wá súan Babilɔninfuɛ mun be aniɛn mɔ yɛle Akadi’n i kanlɛ, nin i kannganlɛ ɔ nin i klɛlɛ. Asa ekun’n, ɔ fata kɛ be di aliɛ nga famiɛn’n nin i awlofuɛ mun be di’n wie. Gbanflɛn sɔ mun be nun wie yɛle Daniɛli, Anania, Mikaɛli, yɛ Azaria. Aspɛnazi tɔnnin be dunman uflɛ. Daniɛli liɛ’n yɛle Bɛltsazar, Anania liɛ’n yɛle Sadraki, Mikaɛl liɛ’n yɛle Mesaki, yɛ Azaria liɛ’n yɛle Abɛdnego. ?Like nga Babilɔninfuɛ mun be kleli be’n ti’n, be yacili Zoova sulɛ?

Gbanflɛn nnan sɔ mun be fuali kpa kɛ bé sú Zoova titi. I sɔ’n ti’n, b’a kunndɛman kɛ bé dí famiɛn’n i aliɛ’n wie. Afin be si kɛ like nga famiɛn’n di’n, be nun wie mun be o lɛ’n, Zoova i Mmla’n se kɛ nán Izraɛlifuɛ mun be di. Be seli Aspɛnazi kɛ: ‘Yaci, nán man e famiɛn’n i aliɛ’n wie.’ Sanngɛ Aspɛnazi seli be kɛ: ‘Sɛ amun a diman famiɛn’n i aliɛ’n wie naan ɔ wun kɛ amun a yo koklo’n, ɔ́ kún min!’

Akunndan kun bali Daniɛli i ti nun. Ɔ seli be sunianfuɛ’n kɛ: ‘Yaci, man e aliɛ nga nnɛn nunman nun’n, ɔ nin nzue ngunmin cɛn ba blu. I sin’n nian e, yɛ nian e wiengu nga be di famiɛn’n i aliɛ’n.’ Be sunianfuɛ’n kplinnin su.

Kɛ cɛn ba blu sinnin’n, Daniɛli nin i janvuɛ nsan mun be ɲrun’n yoli mlanmlan trali gbanflɛn kun nga mun. Zoova i klun jɔli be wun, afin be ɲin yili i. I kpa bɔbɔ’n, ɔ mannin Daniɛli i ngwlɛlɛ naan w’a kwla tu laliɛ mun be bo.

Kɛ be wieli gbanflɛn mun be like kle’n, Aspɛnazi fa be ɔli Nɛbikadnɛzali i wun lɔ. Kɛ famiɛn’n nin be ijɔli’n, ɔ wunnin kɛ Daniɛli nin Anania nin Mikaɛli, yɛ Azaria be si ngwlɛlɛ tra gbanflɛn onga mun. I sɔ’n ti’n, ɔ fali be kɛ be ko di junman i awlo lɔ. Ɔ maan ndɛ cinnjin wie mun be su’n, ɔ́ úsa be ngwlɛlɛ afɛ. Zoova yoli maan be sili ngwlɛlɛ trali famiɛn’n i sa sifuɛ mun, ɔ nin i atrɛ yifuɛ mun be kwlaa.

Kannzɛ bɔbɔ Daniɛli nin Anania nin Mikaɛli, ɔ nin Azaria be o nvle uflɛ nun’n, be wla w’a fiman su le kɛ be ti Zoova i sufuɛ. ?Ɔ kusu’n, sɛ ɔ si nin ɔ nin be nunman ɔ wun lɛ’n, á yó kɛ gbanflɛn nnan sɔ mun sa?