Éyoñ Nebucadnetsar a nga kee bivete ya Juda e Babylone, a nga jô Aschpenaz, mone bezimbi wé wua na, a nyoñe ngab a be. A nga jô na a jeñ bendôman ba dañ biwôlô a atyeñ nsamba ôte asu na, be ye’ele be tañe mimbu milal. Mvuse ya valé ba ye bo bivete ya Babylone. Bendôman bete be mbe be yiane yé’é na ba lañ, na ba tili a kobô nkobô Bechaldéen. Be mbe fe be yiane di bidi njô bôt a bivete bié be mbe be ja’ak. Bendôman benyine ya été be mbe môé na, Daniel, Hanania, Mischaël a Azaria. Aschpenaz a nga ve be môé be Babylonien: Beltschatsar, Schadrac, Méschac a Abed-Nego. Ye miñye’elan be nga ve  bendôman bete mi nga bo na be lume Yéhôva mvus?

Bendôman bete be nga nyoñe ntyi’ane ya ke ôsu a bo Yéhôva mewôk. Be mbe be yeme’e na be nji be be yiane di bidi be mbe be va’a be, amu Atiñe Yéhôva e mbe e jô’ô na, aval bidi ete e mbe mvit. Ane be nga jô Aschpenaz na: ‘Éngôngol, te ve bia bidi bite.’ Nde Aschpenaz a nga jô be na: ‘Nge mi bo te di, a nge njô bôt a yene na mi nji bo mvo’é, a ye wôé ma!’

Ane Daniel a nga bôndé mone fek. A nga jô mba’ale wop na: ‘Éngôngol, va’ané bia ve bilok a mendime ya nyu tañ melu awôm. Éyoñ éte mia ye ve’e mesu mangan a mesu bendôman ba di bidi bi njô bôt.’ Ane mba’ale a nga kañese.

Mvuse melu awôm, Daniel a bemvôé bé belal be nga yéné mvo’é minsôn a dañe bendôman bevok. Yéhôva a nga wô’ô be mvaé amu be nga bo nye mewôk. A nga ve fe Daniel fe’e ya yeme timine miñyenan a biyeyem.

Éyoñ mimbu milal mi nga lôt, Aschpenaz a nga kee bendôman bese be Nebucadnetsar. Ane njô bôt a nga laan a be; nde a nga yene na Daniel, Hanania, Mischaël a Azaria be mbe atyeñ abui a dañe bendôman bevok, a na, be mbe évevé. Ane njô bôt a nga tobe be na be ke saé nda jé. Njô bôt a mbe a sili’i fe be melep asu beta be mam béziñ. Yéhôva a nga bo na bendôman bete be bo fek a dañe mingengañ a mimfefe’e mi bôt mi njô bôt bese.

Ja’a be mbe be too si fe, Daniel, Hanania, Mischaël a Azaria be nji vuane na be mbe bebo bisaé be Yéhôva. Ye wo ye fo’o ke ôsu a simesane Yéhôva, ja’a mia bebiaé bôé mi nji tabe vôme wua?