Ler Neboukadnezar ti pran bann prens Zida e anmenn zot Babilonn, i ti met en zofisye lakour ki ti apel Aspenaz ansarz zot. Neboukadnezar ti demann Aspenaz pour rod bann zenn garson parmi sa bann prens ki ti malen e an bonn sante. Sa bann zenn garson ti pou ganny formen pandan trwa-z-an. Sa formasyon ti pou fer zot vin bann zofisye enportan Babilonn. Sa bann garson ti bezwen aprann lir, ekri e koz Akadyen, en langaz bann Babilonnyen. Zot ti osi bezwen manz menm kalite manze ki lerwa ek son lakour ti manze. Kat parmi sa bann garson ti Danyel, Ananya, Misael ek Azarya. Aspenaz ti donn zot bann non Babilonnyen: Beltesazar, Sadrak, Mesak ek  Abednego. Eski sa ki zot ti pou aprann ti pou anpes zot servi Zeova?

Sa kat garson ti determinen pour obei Zeova. Zot ti konnen ki zot pa devret manz manze lerwa parski Lalwa Zeova ti dir ki serten sa bann manze ti enpir. Alor zot ti dir Aspenaz: ‘Silvouple pa bezwen fer nou manz manze lerwa.’ Aspenaz ti dir zot: ‘Si zot pa manze e lerwa i vwar zot malad, i pou touy mwan!’

Danyel ti annan en nide. I ti dir sa enn ki ansarz zot: ‘Silvouple, donn nou zis legim ek delo pour dis zour. Apre konpar nou avek bann garson ki manz manze lerwa.’ Sa msye ti dakor.

Dis zour apre sa tes, Danyel ek son trwa zanmi ti pli an bonn sante ki tou le zot garson. Zeova ti kontan ki zot ti’n obei li. I ti menm donn Danyel lasazes pour konpran bann vizyon ek rev.

Apre sa formasyon, Aspenaz ti anmenn bann garson kot Neboukadnezar. Lerwa ti koz avek zot e i ti vwar ki Danyel, Ananya, Misael ek Azarya ti pli entelizan e malen ki lezot garson. I ti swazir sa kat garson pour travay dan son lakour rwayal. Souvan lerwa ti demann zot konsey lo bann keksoz enportan. Zeova ti’n fer zot pli malen ki tou bann mazisyen ek konseye lerwa.

Menm si zot ti dan en pei etranze, Danyel, Ananya, Misael ek Azarya pa ti bliye ki zot ti form parti pep Zeova. Eski ou osi ou pou toultan mazin Zeova, menm ler ou paran pa avek ou?