Tuma min na Nebukadnezar ye Zuda faamandenw minɛ ka taga n’u ye Babilonɛ, a y’u kalifa masaso faaman dɔ ma min tɔgɔ ko Asipenazi. Nebukadnezar y’a fɔ Asipenazi ye ko kanbele minw ka kɛnɛ ani u hakili ka bon kosɔbɛ, a k’olu bɔ. U tun bena fɔrɔmasɔn sɔrɔ fɔɔ saan saba. O la, u tun bena kɛ mɔgɔbaw ye Babilonɛ. U tun ka kan ka kalan Babilonɛkaw kaan fɔcogo n’a sɛbɛcogo ani a kalancogo la. Masacɛ n’a somɔgɔw tun be dumuni min kɛ, u tun ka kan k’o lo dumu fana. Kanbele naani dɔw tun b’u cɛma: Daniyɛli, Ananiya, Mikayɛli ani Azariya. Asipenazi ye Babilonɛkaw ka tɔgɔw la u la: Bɛlitasari, Sadiraki,  Mesaki ani Abɛdenego. Yala u lamɔcogo kura tun bena a to u be Jehova sago kɛli dabila wa?

O kanbele naani tun cɛsirinin lo ka mɛnni kɛ Jehova fɛ. U tun b’a lɔn k’u man ɲi ka masacɛ ka dumunifɛnw dumu sabu Jehova ka sariya b’a yira ko u dɔw saniyanin tɛ. O kama, u y’a fɔ Asipenazi ye ko: ‘Sabari k’an tanga masacɛ ka dumuni ma.’ Asipenazi y’a fɔ u ye ko: ‘N’aw t’o dumuni kɛ, ni masacɛ y’a ye ko aw bɔnin be banabagatɔw ma, a bena ne faga!’

Miiriya dɔ tun be Daniyɛli kuun na. A y’a fɔ u kɔrɔsibaga ye ko: ‘Sabari ka ɲugu ni jii dɔrɔn di an ma tile tan kɔnɔ. O kɔ, an suma ni kanbele tɔɔw ye minw be masacɛ ka dumuni kɛ.’ Kɔrɔsibaga sɔnna.

Tile tan tɛmɛnin kɔ, Asipenazi y’a ye ko Daniyɛli n’a teri saba nunu tun ka kɛnɛ ka tɛmɛ tɔɔw bɛɛ kan. U ye mɛnni kɛ Jehova fɛ minkɛ, o diyara Jehova ye. A ye hakilitigiya di Daniyɛli ma yɛrɛ walisa ka yelifɛnw ni sikow kɔrɔ lɔn.

Fɔrɔmasɔn bannin kɔ, Asipenazi tagara ni kanbelew ye Nebukadnezar fɛ. Masacɛ ye baro kɛ n’u ye ani a y’a ye ko Daniyɛli, Ananiya, Mikayɛli ni Azariya hakili ka bon ani u ka cegu ka tɛmɛ u tɔɔw bɛɛ kan. A y’o kanbele naani sugandi ka baara kɛ a ka masaso kɔnɔ. U tun bena masacɛ ladi n’a be kooba dɔw latigɛra. Jehova y’a kɛ u ka hakilitigiya tɛmɛna haali masacɛ ka lɔnnikɛlaw n’a ka jinamoriw bɛɛ kan.

Tiɲɛn lo ko Daniyɛli, Ananiya, Mikayɛli ni Azariya tun be jamana wɛrɛ la. O bɛɛ n’a ta, u ma ɲina k’u ye Jehova ka mɔgɔw ye. Hali n’i tɛ i bangebagaw kɔrɔ, yala ele fana bena i hakili to tuma bɛɛ Jehova la wa?