Ngke e kairiianako tooka mai Iuta Nebukaneta nako Baburon, e rinea Atibenati ae te mataniwi temanna n te baareti bwa e na tararuaiia. Ao Nebukaneta e tuanga Atibenati bwa e na kakaaeia ataeinimwaane aika marurung ao ni wanawana riki mai buakoia. A na kataneiaaki ataeinimwaane aikai i nanon tenua te ririki. A na boni katauraoaki n te kataneiai aei bwa a na riki bwa mataniwi aika kakannato i Baburon. A riai n reireinia ni wareware, ni koroboki, ao n taetae n te taetae ae te Akkadian ae kabonganaaki i Baburon. A kantaningaaki naba bwa a na kana kanan te uea ma kaain te baareti. Aman mai buakoia ataeinimwaane aikai bon Taniera, Aanania, Mitiaera, ao Ataria. E bon angania Atibenati araia ni Baburon aika boou aika Beretetiata, Tiateraka, Metiaka, ao Abeteneko. A  na kairaki n te reirei aei bwa a na katoka aia beku ibukin Iehova?

A motinnanoia ataeinimwaane aika aman aikai bwa a na ongeaba iroun Iehova. A ataia ae a aki riai ni kana kanan te uea ibukina bwa e taekinaki n Ana Tua Iehova bwa a kamwara tabeua mai iai. Ngaia are a taku nakon Atibenati: ‘Taiaoka ma kariaia bwa ti na aki kana kanan te uea.’ E taku Atibenati nakoia: ‘Ngkana kam aki kanna ao ngkana e noringkami te uea bwa kam taraa n aoraki ao ane e na kamateai!’

E reke ana iango Taniera ao e taku nakon te tia tararuaiia: ‘Taiaoka ma anganira tii aroka aika kakanaki ao te ran i nanon tebwina te bong. Imwin anne, ko na kabotauira ma ataeinimwaane ake a kakana kanan te uea.’ Ao e kariaia te tia tararuaiia.

Imwin tebwina te bong, a taraa ni marurung riki Taniera ma raona ake teniman nakoia ataeinimwaane ake tabeman. E kukurei Iehova bwa a ongeaba irouna. E angan naba Taniera te wanawana bwa e na atai nanoni miitara ao taiani mii.

Ngke e a toki te kataneiai, e a kairiia ataeinimwaane ni kabane Atibenati nakon Nebukaneta. E maroro te uea ma ngaiia ao e noria bwa a wanawana ao n taningamarau riki Taniera, Aanania, Mitiaera, ao Ataria nakoia ake tabeman. E rineiia naaka aman aikai bwa a na mwakuri n ana baareti. E aki toki te uea n tuangia aia taeka n reirei ibukini baika kakawaki. E angania Iehova te wanawana ae raka riki nakoia mwaane ake ana tia rabakau te uea ao taan tabunea.

A aki roko n te mwaninga Taniera, Aanania, Mitiaera, ao Ataria ae bon ana aomata Iehova ngaiia, e ngae ngke a mena n te aba ae a ianena iai. Ko na ururinga naba ngkoe Iehova n taai nako, e ngae ngkana akea i rarikim am karo?