Sang gindala ni Nabocodonosor ang mga prinsipe sang Juda sa Babilonia, ginpili niya ang opisyal sang palasyo nga si Aspenaz para mag-atipan sa ila. Ginsilingan ni Nabocodonosor si Aspenaz nga magpili halin sa ila sing mga kabataan nga lalaki nga pinakamaalam kag maayo ang panglawas. Pagahanason sila sing tatlo ka tuig. Ang paghanas magahanda sa ila para mangin mataas nga mga opisyal sa Babilonia. Ini nga mga kabataan magatuon sa pagbasa, pagsulat, kag paghambal sing Akkadian nga lenguahe sang Babilonia. Ginapaabot man nga magakaon sila sing pagkaon sang hari kag sang mga tawo sa palasyo. Ang apat nga nalakip sa mga ginpili amo si Daniel, si Hananias, si Misael, kag si Azarias. Ginhatagan sila ni Aspenaz sing Babilonianhon nga mga ngalan: Beltesasar, Sadrac, Mesac, kag  Abednego. Ini bala nga paghanas magapauntat sa ila sa pag-alagad kay Jehova?

Ining apat ka kabataan determinado gid nga tumanon si Jehova. Nahibaluan nila nga indi sila dapat magkaon sing pagkaon sang hari kay suno sa Kasuguan ni Jehova ang pila sini indi matinlo. Gani nagsiling sila kay Aspenaz: ‘Palihug indi kami pagpakan-a sang pagkaon sang hari.’ Si Aspenaz nagsiling sa ila: ‘Kon indi kamo magkaon kag makita sang hari nga daw masakiton kamo, patyon gid niya ako!’

May napensaran si Daniel. Nagsiling sia sa manug-atipan sa ila: ‘Palihug hatagi lang kami sing utan kag tubig sa sulod sang napulo ka adlaw. Dayon ikumparar mo kami sa mga kabataan nga nagakaon sing pagkaon sang hari.’ Nagpasugot ang ila manug-atipan.

Pagligad sang napulo ka adlaw, mas maayo ang panglawas ni Daniel kag sang tatlo niya ka abyan sangsa iban nga kabataan. Nalipay si Jehova kay gintuman nila sia. Ginhatagan pa gani niya si Daniel sing kaalam para maintiendihan ang mga palanan-awon kag mga damgo.

Sang natapos ang paghanas, gindala ni Aspenaz ang mga kabataan nga lalaki kay Nabocodonosor. Nakighambal ang hari sa ila kag nakita niya nga mas maalam si Daniel, si Hananias, si Misael, kag si Azarias sangsa iban nga kabataan. Gani ginpili sang hari ining apat para mag-obra sa iya palasyo. Ang hari pirme nagapangayo sing laygay sa ila parte sa importante nga mga butang. Ginhimo sila ni Jehova nga mas maalam sangsa maalam nga mga lalaki kag mga madyikero sang hari.

Bisan pa ara sa iban nga pungsod si Daniel, si Hananias, si Misael, kag si Azarias, wala nila malipatan nga katawhan sila ni Jehova. Pirme mo man bala dumdumon si Jehova, bisan indi mo kaupod ang imo mga ginikanan?