Lebuh Nebukadnesar naban peturun raja menua Judah ngagai Babilon, iya ngasuh pemesai ke benama Aspenas nyaga sida. Nebukadnesar ngasuh Aspenas milih nembiak lelaki ke bepengerai sereta pintar. Bala nembiak tu deka dilatih pengelama tiga taun. Latih tu deka nyediaka sida ngambika ulih nyadi pemesai ti bepangkat tinggi ba Babilon. Bala nembiak tu patut belajar macha, nulis sereta bejaku dalam bansa jaku orang Babilon. Sida deka makai pemakai ti sama enggau raja sereta orang ke ba istana nya. Empat iku ari nembiak lelaki nya Daniel, Hananiah, Misael enggau Asariah. Aspenas meri sida nama orang Babilon: Beltesasar,  Sadrak, Mesak enggau Abednego. Kati utai ke dipelajar sida ulih ngasuh sida badu nyembah Jehovah?

Empat iku nembiak tu keran deka nangika Jehovah. Sida nemu sida enda tau makai pemakai raja laban Adat Jehovah madah sekeda pemakai nya enda tuchi. Sida madah ngagai Aspenas: ‘Tulung anang mejal kami makai pemakai raja.’ Saut Aspenas: ‘Enti kita enda makai lalu raja meda kita baka ke enda entu gerai, iya tentu deka munuh aku!’

Daniel bisi siti chara. Iya madah ngagai orang jaga: ‘Beri kami semina sayur enggau ai aja dalam kandang sepuluh hari tu. Udah nya nuan tau mandingka kami enggau orang bujang ke makai pemakai raja.’ Orang jaga nya setuju.

Udah sepuluh hari, Daniel enggau bala pangan iya berupai gerai agi ari semua bala nembiak lelaki ke bukai. Jehovah lantang ati laban sida nangika Iya. Indah Iya meri penemu-dalam ngagai Daniel ngambika ulih meretika genera enggau mimpi.

Pengudah sida abis dilatih, Aspenas mai sida ngagai Nebukadnesar. Raja berandau enggau sida lalu nemu Daniel, Hananiah, Misael enggau Asariah pintar agi sereta jampat mereti ari semua nembiak ke bukai. Raja milih sida nyadi pemesai ke bekereja ba istana raja. Raja selalu betanya ngagai sida kena ngulihka penemu pasal pekara ti berat. Jehovah ngasuh sida pintar agi ari semua penyanding penemu raja sereta tukang majik.

Taja pan sida ba menua bukai, Daniel, Hananiah, Misael enggau Asariah seruran ingat sida nya nembiak Jehovah. Kati nuan mega deka seruran ingat Jehovah, taja pan apai indai nadai enggau nuan?