Yĩla Nevukatilesa woosie andũ ma nyũmba ĩla yaĩle kuma asumbĩ ma Yuta na amatwaa Mbaviloni, nĩweaĩe mũnene weetawa Asivenasi amaũngamĩe. Nevukatilesa eeie Asivenasi anyuve imwana ila syĩ na mĩĩ mĩseo na mbanake katĩ wa andũ asu. Imwana isu syaaĩlĩte kũmanyĩwʼa vandũ va myaka ĩtatũ. Syamanyĩawʼa nĩ kana itwʼĩke anene Mbaviloni. Maũndũ amwe syaaĩlĩte kũmanyĩwʼa nĩ kũsoma, kũandĩka, na kũneena kĩthyomo kĩla kyaneenawa Mbaviloni. O na ĩngĩ, imwana isu nĩsyaaĩlĩte kũya lĩu ũla waĩsawa nĩ mũsumbĩ na andũ make. Imwana inya katĩ wa isu syaĩ Ndanieli, Aanania, Misaeli, na Asalia. Asivenasi nĩwanengie imwana isu masyĩtwa angĩ na asyĩta: Mbelitesasa, Satalaki, Mesaki, na Aveti-neko. Kyo kĩsomo kĩu nĩkyatumie imwana isu ieka kũmũthũkũma Yeova?

 Imwana isu syĩ inya nĩsyatwʼĩte vyũ kũmwĩwʼa Yeova. Nĩsyeesĩ kana iyaaĩle kũya lĩu wa mũsumbĩ nũndũ kwosana na Mĩao ya Yeova ve malĩu amwe maĩsawa kwa mũsumbĩ mataĩ matheu. Kwoou syatavya Asivenasi atĩĩ: ‘Mwa ndũkatwĩe tũye lĩu wa mũsumbĩ.’ Nake Asivenasi aisũngĩa asyĩa: ‘Mwalea kũya lĩu wa mũsumbĩ na aimwona mũilye ta mwĩ awau, nũkũmbũaa.’

Ĩndĩ Ndanieli nĩwatavisye mũndũ ũla wanengetwe wĩa wa kũmasũvĩa ũndũ mũseo. Amwĩie: ‘Nĩtũũkwĩsũva ũtũnenge nyũnyi na kĩwʼũ vandũ va mĩthenya ĩkũmi. Ĩtina wa ũu tũsianĩsye na imwana ila iĩsaa lĩu wa mũsumbĩ.’ Mũndũ ũsu nĩweetĩkĩlile kwĩka ũu.

Ĩtina wa mĩthenya ĩsu ĩkũmi, Ndanieli na ala anyanyae atatũ maĩ anou kwĩ imwana ila ingĩ syonthe. Yeova nĩweewie mũyo nũndũ imwana isu nĩsyamwĩwie. O na nĩwanengie Ndanieli ũĩ nĩ kana aeleawe woni na ndoto.

Yĩla ĩvinda ya kũmanyĩsya imwana isu yathelile, Asivenasi nĩwaitwaie mbee wa Nevukatilesa. Mũsumbĩ Nevukatilesa nĩwaneenie nasyo na ĩndĩ eethĩa Ndanieli, Aanania, Misaeli, na Asalia nĩ oĩ mũno vyũ kwĩ imwana ila ingĩ syonthe. Kwoou nĩwainyuvie ithũkũmae nyũmbanĩ yake. Mũsumbĩ nĩwakothaa kũikũlya ũtao ĩũlũ wa maũndũ ala ma vata. Yeova nĩwatumĩte imwana isu syĩthĩwa syĩ mbũĩ kwĩ atai onthe ma mũsumbĩ na awe.

O na kau Ndanieli, Aanania, Misaeli, na Asalia maĩ nthĩ ĩngĩ, mayaaũlwa kana mo maĩ andũ ma Yeova. We ũkekalaa ũmũlilikene Yeova o na yĩla wĩ vaasa na asyai maku?