Rĩrĩa Nebukadinezaru aanyitire anene a Juda na akĩmatwara Babuloni, nĩ aathurire mũnene wetagwo Ashipenazi amarorage. Nebukadinezaru nĩ eerire Ashipenazi amwethere anake arĩa maarĩ athaka na maarĩ na hinya kũrĩ acio angĩ. Anake acio mangĩamenyeririo kwa ihinda rĩa mĩaka ĩtatũ. Kũmenyerio kũu kũngĩamateithirie gũtuĩka anene kũu Babuloni. Anake acio no mũhaka mangĩerutire gũthoma, kwandĩka, na kwaria rũthiomi rwa Akalidei. Ningĩ nĩ maagĩrĩirũo kũrĩa irio iria ciarĩagwo nĩ mũthamaki na anene ake. Amwe a anake acio maarĩ Danieli, Hanania, Mishaeli, na Azaria. Ashipenazi nĩ aamaheire marĩĩtwa ma kũu Babuloni akĩmeta: Beliteshazaru, Shadraka, Meshaka,  na Abedinego. Hihi gĩthomo kĩu maaheirũo nĩ kĩngĩatũmire matige gũtungatĩra Jehova?

Anake acio ana nĩ maatuĩte itua rĩa gwathĩkĩra Jehova. Nĩ maamenyaga atĩ maatiagĩrĩirũo kũrĩa irio cia mũthamaki tondũ Watho wa Jehova nĩ woigĩte atĩ imwe ciacio ciarĩ na thahu. Nĩ ũndũ ũcio meerire Ashipenazi ũũ: ‘Twagũthaitha ndũgatũhe irio cia mũthamaki.’ Nake Ashipenazi akĩmeera: ‘Mwaga kũrĩa irio cia mũthamaki acoke amuone mũrĩ ahĩnju, no ekũnjũraga!’

No Danieli aarĩ na rĩciria. Eerire mũndũ ũrĩa wamarũgamagĩrĩra ũũ: ‘Twagũthaitha ũtũheage o maĩ na irio cia mũgũnda kwa ihinda rĩa thikũ ikũmi. Ũcoke ũtũringithanie na anake arĩa marĩrĩaga irio cia mũthamaki.’ Na mũndũ ũcio agĩtĩkĩra.

Thutha wa thikũ ikũmi, Danieli na anake acio angĩ atatũ nĩ monekanire marĩ athaka na marĩ na riri gũkĩra acio angĩ. Jehova nĩ aakenire mũno tondũ nĩ maamwathĩkĩire. O na nĩ aaheire Danieli ũtaũku wa kũmenya gũtaũra cioneki na iroto.

Ashipenazi aarĩkia kũmenyeria anake acio, nĩ aamatwarire kũrĩ mũthamaki Nebukadinezaru. Mũthamaki nĩ aaririe nao na akĩona atĩ Danieli, Hanania, Mishaeli, na Azaria maarĩ ogĩ gũkĩra anake acio angĩ othe. Nĩ aamathurire nĩguo marutage wĩra nyũmba-inĩ yake. Kaingĩ mũthamaki nĩ aamahoyaga ũtaaro maũndũ-inĩ ma bata. Jehova nĩ aatũmĩte makorũo na ũtaũku gũkĩra ago na andũ arĩa othe maataaraga mũthamaki.

O na gũtuĩka Danieli, Hanania, Mishaeli, na Azaria maarĩ bũrũri wa kũraya, matiariganĩirũo atĩ maarĩ ndungata cia Jehova. Hihi wee nĩ ũrĩririkanaga Jehova hĩndĩ ciothe nginya rĩrĩa mũtarĩ hamwe na aciari aku?