Eshi Nebukadnesar a kufa omalenga aJuda kuBabilon, okwa li e va tula mepashukilo lelenga ledina Aspenas. Nebukadnesar okwa li a lombwela Aspenas a konge ovamati ovanyasha ve na oukolele nosho yo ounongo. Ovanyasha ovo ova li tava ka deulwa oule womido nhatu. Edeulo olo ola li tali va longekidile oku ka kala va fimana muBabilon. Ovamati ovo ova li ve lihonga okulesha, okushanga nosho yo okupopya elaka lOvakaldi olo la li hali popiwa muBabilon. Ova li yo va teelelwa va lye oikulya ya faafana naayo kwa li hai liwa kohamba nokovaneumbo layo. Ovanyasha ovo vane ovo Daniel, Hananja, Misael naAsarja. Aspenas okwe va luka omadina mape Oshibabilon: Beltsasar, Sadrak, Mesak naAbednego. Mbela ehongo olo ola li tali ke va efifa po okulongela Jehova?

 Ovanyasha ovo vane ova li va tokola okudulika kuJehova. Ova li ve shi shii kutya kave na okulya oikulya yohamba molwaashi Omhango yaJehova oya popya kutya imwe yomuyo inai koshoka. Ova li va lombwela Aspenas tava ti: ‘Alikana ino tu pa oikulya yohamba.’ Aspenas okwe va lombwela ta ti: ‘Ngeenge itamu li, ndele ohamba tai mono muhe na oukolele, otai ka dipaa nge.’

Daniel okwa li e na po ediladilo. Okwa indila omupashukili wavo a ti: ‘Tu kwafa u tu pe ashike oikwambidi nomeva a wana omafiku omulongo. Ndele to tu yelekanifa novamati ovo va lya oikulya yohamba.’ Omupashukili wavo okwa li a dimina okuninga ngaho.

Konima yomafiku omulongo, Daniel nookaume kaye vatatu ova li tava monika ve na oukolele okuyelekanifa novamati vakwao. Jehova okwa li a hafa eshi va dulika kuye. Okwa li nokuli a pa Daniel ounongo wokufatulula omamoniko nosho yo eendjodi.

Eshi edeulo la pwa, Aspenas okwa li a twala ovamati ovo kuNebukadnesar. Opo nee ohamba oya popya navo, ndele tai mono kutya Daniel, Hananja, Misael naAsarja ovo va li ve na ounongo nove na omaukwatya mawa ve dule ovamati aveshe. Okwa hoolola ovo vane va ninge omalenga aye omombala. Ohamba oya kala hai va pula luhapu omayele moinima ya fimana. Jehova oye a li e va pa ounongo muhapu u dule wovanongo neemhule dohamba.

Nonande Daniel, Hananja, Misael naAsarja ova li moshilongo shihe fi shavo, kava li va dimbwa kutya ove li ovapiya vaJehova. Mbela naave oto ka kala ngoo alushe ho dimbuluka Jehova, nokuli nonande ovadali voye kave li naave?