We Nɛbyukadnɛza kɛr di prins dɛn na Juda go na Babilɔn, i put wan man we gɛt ay pozishɔn na di pales, we nem Ashpinaz, in chaj ɔf dɛn. Nɛbyukadnɛza bin tɛl Ashpinaz fɔ fɛn di yɔŋ bɔbɔ dɛn we gɛt sɛns ɛn we gɛt wɛlbɔdi pas ɔl di ɔda wan dɛn. Dɛn go tren dɛn yɔŋ bɔbɔ dɛn de fɔ tri ia. Dis trenin go pripia dɛn fɔ bi pipul dɛn we gɛt ay pozishɔn na Babilɔn. Di bɔbɔ dɛn bin nid fɔ lan fɔ rid, rayt, ɛn fɔ tɔk di Babilonian dɛn langwej. Ɛn dɛn bin want fɔ lɛ dɛn it di sem kayn it we di kiŋ ɛn di pipul dɛn we gɛt ay pozishɔn na di pales de it. Daniɛl, Ananaya, Mishɛl, ɛn Azaraya na 4 pan dɛn bɔbɔ dɛn de. Ashpinaz gi dɛn nyu Babilonian nem dɛn we na: Bɛltishaza,  Shedrak, Mishak, ɛn Abɛdnigo. Fɔ se dis buk we dɛn go lan go mek dɛn stɔp fɔ sav Jiova?

Dɛn 4 bɔbɔ dɛn ya bin dɔn mekɔp dɛn maynd fɔ obe Jiova. Dɛn bin no se dɛn nɔ fɔ it di kiŋ in it bikɔs Jiova in Lɔ se sɔm pan di tin dɛn we di kiŋ de it nɔ klin. So dɛn tɛl Ashpinaz se: ‘Duya nɔ mek lɛ wi it di kiŋ in it.’ Ashpinaz tɛl dɛn se: ‘If una nɔ it ɛn di kiŋ si se una luk lɛk pɔsin we sik, i go kil mi!’

Daniɛl bin no wetin dɛn fɔ du. I tɛl di wan we de in chaj ɔf dɛn se: ‘Duya gi wi vɛjitebul dɛn ɛn wata nɔmɔ fɔ tɛn dez. Dɔn kɔmpia wi wit di bɔbɔ dɛn we de it di kiŋ in it dɛn.’ Di wan we de in chaj ɔf dɛn gri fɔ du dat.

Afta di tɛn dez fɔ di tɛst dɔn, Daniɛl ɛn in tri padi dɛn bɔdi bin fayn pas di ɔda wan dɛn. Jiova bin rili gladi bikɔs dɛn obe am. I ivin gi Daniɛl sɛns fɔ ɔndastand drim ɛn vishɔn dɛn.

We di bɔbɔ dɛn dɔn di trenin, Ashpinaz kɛr dɛn go to Nɛbyukadnɛza. Di kiŋ tɔk wit dɛn ɛn si se Daniɛl, Ananaya, Mishɛl, ɛn Azaraya rili gɛt sɛns, ɛn dɛn kwik fɔ no sɔntin pas ɔl di ɔda bɔbɔ dɛn. I pik dɛn 4 bɔbɔ dɛn ya fɔ wok na in pales. We di kiŋ kin gɛt impɔtant tin dɛn fɔ disayd, i kin aks dɛn fɔ advays. Jiova bin mek dɛn gɛt sɛns pas ɔl di kiŋ in sɛnsman dɛn ɛn majikman dɛn.

Pan ɔl we dɛn bin de na difrɛn land, Daniɛl, Ananaya, Mishɛl, ɛn Azaraya nɔ bin fɔgɛt se dɛn na Jiova in pipul dɛn. Yusɛf go mɛmba Jiova ɔltɛm, ivin di tɛm we yu mama ɔ papa nɔ go de wit yu?