Mɛɛ Nɛbukanɛɛsa chua wanaa fula o yuŋgu lemasaa choo wa Chuda mbo kua a nda o chɛleŋ niŋ Babilɔŋ, mbo dimul laŋgbaa nduaa kalla opilɛ diolaŋ aa Asipɛnasi, le mbo wa nda hɔlteŋ. Mi masaa Nɛbukanɛɛsa dimul Asipɛnasi le mbo hɛli puaambuaa nɔ kɛndiaa sɔviɔɔ, nduyɛ ma nɔ kɔl kaloo tau wa nda tɛɛŋ. Puaambuaa haa ndaa nɔ ma sɔla pɛɛkoo le wɔsilaŋ la yaa. Nduyɛ pɛɛkoo hoo wa nda bɛɛndiaa le foofola sɔvɛlaŋ o masale Babiloniaŋnda niŋ. Puaambuaa haa ndaa nɔ ma pɛɛku le diomndaŋ veeloo, poonyiaa, nduyɛ ma dimi suɛi maŋgalɛi Babilɔŋ. Nduyɛ ndaa nɔ vɛlɛ ma de nyɛdiaa masaa ndoo diaa nda laŋgbaa nduaa kalla wo. O nda tɛɛŋ, a hiɔɔlu ndaa nɔ diolaŋ ni aa Daaniɛɛ, Hananiya, Mɛsiaki, a Asaluiya. Mi Asipɛnasi ke nda diola Babiloniaŋnda aa:  Bɛtisiasa, Siadulua, Mɛsiaki, a Abɛniko. Baa pɛɛkoo hoo ndoo kuuna nda niŋ pa Chɛhowa piɛiyo?

Mi puaambuaa hiɔɔluaa haa kɛɛsiaa a kɔl ndaa kpou le Chɛhowa diomndo tueiyɔɔ. Ndaa sina maa a nɔ ma de nyɛdiaa masaa le. Kanifuule, a mɛɛ Sawa Chɛhowaa dimi yɛ, nyɛdiaa hoo opum ve o diandaa Mɛlɛka o hɔl te. Le hei, ma dimul Asipɛnasi aa: ‘Yandii, ke naa nyɛdiaa masaa miŋ de le.’ Mi Asipɛnasi dimul nda aa: ‘Te la di nyɛdiaa hoo le, nduyɛ mi masaa che nya a nyavɛi, o cho ya diyɔɔ.’

Mi Daaniɛɛ huŋ a kɛɛsiaa. Mbo dimul wana wa nda hɔlteŋ ndo aa: ‘Yandii fallo, wa naa lamnda yɔŋaalaŋ kioo a mɛŋndaŋ le palɛi tɔ. Okoŋ, ma mɛɛndaŋ naa a wanaa cho nyɛdiaa lemasaa dioo wa vellaa velle ma kelu yamɛi.’ Mi wana wa nda hɔlteŋ ndo chɛl.

Mɛɛ palɛi tɔ nda wa o tofaa bɛŋgu ve hiou, Daaniɛɛ a chaaŋaa nduaa yaa wa wa nyɛkɛndɛi o dialloŋ niŋ mbo hiau puaambuaa tuaa kpou. Mi Chɛhowa naŋ kɔl tau a nda le mɛɛ nda tuei ndu diom yɛ. Mbo ke pɛŋ Daaniɛɛ taasioo le mbo sina a yilaŋndoŋ vɛlɛ a lɔma sɔlaŋ okɔɔ.

Mɛɛ nda chii nda pɛɛku, mi Asipɛnasi kua a nda naa Nɛbukanɛɛsa chua. Mi masaa suaa o nda lo. Nduyɛ mbo cha maa Daaniɛɛ, Hananiya, Mɛsiaki, a Asaluiya, ndaa nɔ kɔl kaloo ma hiau puaambuaa tuaa kpou. Mbo hɛli puaambuaa hiɔɔluaa haa le wallo tosaa o chiɛi ndɔ lemasaa niŋ. Nduyɛ teleŋnda bɔɔbɔɔ, mi ndoo nyuna nda le silaa a sɔɔŋ sɔviɔŋ ŋpum okɔɔ. Mi Chɛhowa ke nda taasioo mbo hiau wanaa ndaa sila masaa wa, a wanaa nduaa viamaa layawaa.

Mi che bɛɛ Daaniɛɛ, Hananiya, Mɛsiaki, a Asaluiya wa o lɛŋnde cheleŋ niŋ, kɛ a puɛɛnuŋ maa wanaa Chɛhowaa le nda cho le. Baa num bɛɛ cho pa yiyaŋndo lɔɔlɔɔ a Chɛhowa okɔɔ o yɔŋ bɛɛ mi wanaa velu numnda ve num ikɛi le?