တၢ်မၤလိ ၅၉
ပိာ်ခွါသးစၢ်လွံၢ်ဂၤ ဒိကနၣ်ယဟိဝၤယွၤအကလုၢ်
ဖဲစီၤပၤနဘူၤကးန့စၢ် က့ၤကိးဝဲပှၤယူဒၤဖိအပဒိၣ်ပပှၢ်ဒီးစီၤပၤ အဒူၣ်ဖိထၢဖိတဖၣ်လၢ ကီၢ်ဘၤဘူၤလိၣ်ပူၤအခါ အဝဲပာ်လီၤအပဒိၣ်တဂၤ လၢအမံၤမ့ၢ်ဝဲ စီၤအၤၡပနးလၢအဝဲသ့ၣ်အဖီခိၣ်လီၤ. ဒီးလၢပှၤတဖၣ်အံၤအကျါ စီၤပၤနဘူၤကးန့စၢ်မၢ စီၤအၤၡပနး ဃုထၢထီၣ်ပှၤသးစၢ်လၢ အဖၠဲးကတၢၢ်လၢအအိၣ်ဒီး တၢ်အိၣ်ဆူၣ်အိၣ်ချ့လၢအဂ့ၤကတၢၢ်လီၤ. ပိာ်ခွါသးစၢ်တဖၣ်န့ၣ် ကဒိးန့ၢ်ဘၣ်တၢ်မၤလိလၢသၢနံၣ်အတီၢ်ပူၤလီၤ. တၢ်မၤလိအံၤကမၤစၢၤအဝဲသ့ၣ် ဒ်သိးကကဲထီၣ်ဝဲပဒိၣ်လၢ ကီၢ်ဘၤဘူၤလိၣ်အပူၤလီၤ. စီၤပၤနဘူၤကးန့စၢ်ပာ်လီၤဝဲ ပဒိၣ်ဖးဒိၣ်တဂၤလၢအမံၤမ့ၢ်ဝဲ စီၤအၤၡပနး လၢကကွၢ်ထွဲ ပှၤသးစၢ်တဖၣ်အံၤအဂီၢ် လီၤ. ပိာ်ခွါသးစၢ်တဖၣ်န့ၣ် ကဘၣ်မၤလိဝဲ ကီၢ်ဘၤဘူၤလိၣ်အကျိာ် လၢအမ့ၢ် အခါဒံၤယဲၤကျိာ် ဒ်သိး တဲ, ဖး, ဒီးကွဲးလံာ်ကသ့ဂ့ၤဂ့ၤအဂီၢ်လီၤ. ပိာ်ခွါသးစၢ်တဖၣ်အံၤ ကဘၣ်အီၣ်တၢ်အီၣ်ဒ် စီၤပၤဒီးပဒိၣ်တဖၣ်အီၣ်ဝဲအသိးစ့ၢ်ကီးလီၤ. လၢပိာ်ခွါသးစၢ်တဖၣ်အကျါ ပိာ်ခွါလွံၢ်ဂၤလၢအမံၤမ့ၢ်ဝဲ စီၤဒၤနံးယ့လး, စီၤဃနၤနယၤ, စီၤမံၡအ့လး ဒီးစီၤဧစၤရယၤန့ၣ် ဘၣ်တၢ်ယုၢ်န့ၢ်အဝဲသ့ၣ်အမံၤလၢအသီ လၢပှၤဘၤဘူၤလိၣ်ဖိအကျိာ်န့ၣ်လီၤ. အဝဲသ့ၣ်အမံၤလၢအသီန့ၣ်မ့ၢ်ဝဲ စီၤဘ့ၤလးတၡါစၢ်, စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤလီၤ.
တၢ်ကူၣ်ဘၣ်ကူၣ်သ့လၢ အဝဲသ့ၣ်ဒိးန့ၢ်ဘၣ်ဝဲလၢ ကီၢ်ဘၤဘူၤလိၣ်အပူၤန့ၣ် မ့ၢ်အကမၤဟးဂီၤအဝဲသ့ၣ် အတၢ်ရ့လိာ်သးဒီး ယဟိဝၤယွၤဧါ.ပိာ်ခွါသးစၢ်လွံၢ်ဂၤအံၤ ဆၢတဲာ်လီၤအသးဂၢၢ်ဂၢၢ်ကျၢၤကျၢၤလၢ အဝဲသ့ၣ်ကဒိကနၣ်ဝဲ ယဟိဝၤယွၤ အကလုၢ်လီၤ. မ့ၢ်လၢယဟိဝၤယွၤအတၢ်သိၣ်တၢ်သီ တဲဝဲလၢစီၤပၤအတၢ်အီၣ်တၢ်အီတနီၤန့ၣ် တကဆှီဘၣ်. အဃိ အဝဲသ့ၣ်သ့ၣ်ညါဝဲလၢ တကြၢးဘၣ်. အဝဲသ့ၣ်တဲဘၣ်စီၤအၤၡပနးလၢ– ‘ဝံသးစူၤ ပတအဲၣ်ဒိးအီၣ် စီၤပၤအတၢ်အီၣ်ဘၣ်.’ စီၤအၤၡပနး တဲဆၢက့ၤအဝဲသ့ၣ်လၢ– ‘သုမ့ၢ်တအီၣ်စီၤပၤအတၢ်အီၣ်ဒီး စီၤပၤမ့ၢ်ထံၣ်ဝဲလၢသု တအိၣ်ဆူၣ်အိၣ်ချ့န့ၣ် စီၤပၤကမၤသံယၤလီၤ.’
စီၤဒၤနံးယ့လးတဲဘၣ် စီၤအၤၡပနးလၢ– ‘လၢအသီတဆံအတီၢ်ပူၤန့ၣ် ဝံသးစူၤဟ့ၣ်ဒုးအီၣ်ပှၤထဲ တၢ်ဒိးတၢ်လၣ် ဒီးထံတက့ၢ်. ဝံၤဒီး ထိၣ်သတြီၤပှၤဒီးပိာ်ခွါသးစၢ်လၢ အအီၣ်စီၤပၤအတၢ်အီၣ်သၢၣ်.’ စီၤအၤၡပနးတူၢ်လိာ်ဝဲ စီၤဒၤနံးယ့လးအတၢ်ကတိၤလီၤ.
ဖဲအသီတဆံဝံၤအလီၢ်ခံ စီၤဒၤနံးယ့လးဒီးအသကိးတဖၣ်န့ၣ် အတၢ်အိၣ်ဆူၣ်အိၣ်ချ့ဂ့ၤန့ၢ်ဒံး ပိာ်ခွါသးစၢ်လၢအဂၤတဖၣ်လီၤ. ဒီးခီဖျိလၢအဝဲသ့ၣ်ဒိကနၣ် ယဟိဝၤယွၤအကလုၢ်အဃိ ကစၢ်ယွၤသးခုဝဲလီၤ. တကးဒံးဘၣ် ယဟိဝၤယွၤဟ့ၣ်လီၤစီၤဒၤနံးယ့လး တၢ်ကူၣ်သ့ဒ်သိးကနၢ်ပၢၢ်ဝဲ တၢ်ထံၣ်လၢညါခီ ဒီးတၢ်မံမီၢ်တဖၣ်အခီပညီအဂီၢ်လီၤ.
ဖဲတၢ်မၤလိဝံၤအခါ စီၤအၤၡပနးလဲၤကိးပိာ်ခွါသးစၢ်တဖၣ် ဆူစီၤပၤနဘူၤကးန့စၢ်အအိၣ်လီၤ. ဖဲစီၤပၤတဲတၢ်ဒီးပိာ်ခွါသးစၢ်တဖၣ်အခါ စီၤပၤထံၣ်ဘၣ်ဝဲလၢ စီၤဒၤနံးယ့လး, စီၤဃနၤနယၤ, စီၤမံၡအ့လးဒီး စီၤဧစၤရယၤန့ၣ် ဖၠဲးဒီးအိၣ်ဒီးတၢ်ပလီၢ်သူၣ်ပလီၢ်သးဒိၣ်န့ၢ်ဒံး ပိာ်ခွါသးစၢ်လၢအဂၤတဖၣ်န့ၣ်လီၤ. စီၤပၤဃုထၢထီၣ်ဝဲ ပိာ်ခွါသးစၢ်လွံၢ်ဂၤအံၤလၢ ကမၤတၢ်လၢအနီပူၤလီၤ. ဒီးဖဲတၢ်ဂ့ၢ်လၢအရ့ဒိၣ်တဖၣ် ဟဲအိၣ်ထီၣ်အခါ စီၤပၤဃ့တၢ်ဟ့ၣ်ကူၣ်ဟ့ၣ်ဖးလၢ အဝဲသ့ၣ်အအိၣ်လီၤ. ယဟိဝၤယွၤမၤစၢၤပှၤသးစၢ်လွံၢ်ဂၤအံၤ ဒ်သိးအဝဲသ့ၣ်ကအိၣ်ဒီးတၢ်ကူၣ်သ့အါန့ၢ်ဒံး စီၤပၤအပှၤကူၣ်တၢ်သ့ဒီး ပှၤလၢအမၤကဒါမဲာ်တဖၣ်န့ၣ်လီၤ.
စီၤဒၤနံးယ့လး, စီၤဃနၤနယၤ, စီၤမံၡအ့လး ဒီးစီၤဧစၤရယၤအိၣ်ဘၣ်လၢ ပှၤဂၤအထံအကီၢ်ဘၣ်ဆၣ် အဝဲသ့ၣ်တသးပ့ၤနီၣ်ဝဲလၢ အဝဲသ့ၣ်မ့ၢ်ယဟိဝၤယွၤအခ့အပှၤတဖၣ်ဘၣ်. ဒ်န့ၣ်အသိး ဖဲနမိၢ်နပၢ်မ့ၢ်တအိၣ်ဒီးနၤအခါ မ့ၢ်နသ့ၣ်နီၣ်ထီၣ်ယဟိဝၤယွၤထီဘိဧါ.
“နဲဒၣ်အံၤ, မ်နသုတဒုးမၤတရီတပါနၤလၢ နသးစၢ်အဃိ, လၢပှၤနီတဂၤတဂ့ၤ. မ့မ့ၢ် မ်နကဲလၢတၢ်အဒိအတဲာ်လၢ ပှၤစူၢ်က့ၤနာ်က့ၤတၢ် အမဲာ်ညါလၢတၢ်ကတိၤ, လၢတၢ်ဖံးတၢ်မၤ, လၢတၢ်အဲၣ်တၢ်ကွံ, လၢတၢ်စူၢ်တၢ်နာ်, လၢတၢ်စီဆှံအပူၤတက့ၢ်.”—၁ တံၤမသ့း ၄:၁၂