Vava Nebukandesa kanata akuluntu a Yuda kuna Babele, wabavana vana moko ma mfumu mosi a makesa wakala ye nkumbu Asipenaze. Nebukandesa wavovesa Asipenaze vo kavava matoko mena yo vimpi wambote ye ngangu. Matoko mama belongwa mu mvu ntatu. E malongi belongwa mekubasadisa mu kituka mfumu muna Babele. Matoko mama bafwete longoka tanga, soneka yo vova e ndinga ya esi Babele. Bafwete mpe dianga madia mana madianga ntinu ye selo yandi. Ayá muna matoko mama i Daniele, Kananiya, Misaele yo Azareya. Asipenaze wabavana nkumbu zampa za esi Babele: Beletesasa; Saderake, Misake yo Abedengo. Nga malongi mama mabafila mu yambula sambila Yave?

 E matoko yá mama bakala ye kani dia lemvokela Yave. Bazaya wo vo ke bafwete dia madia ma ntinu ko kadi o Nsiku a Yave wavovanga vo madia mankaka mafunzuka. Muna kuma kiaki, bavovesa Asipenaze vo: ‘Dodokolo, kutuvani madia ma ntinu ko.’ Asipenaze wabavovesa vo: ‘Avo ke nudidi madia mama ko yo moneka vo nutandidi e nitu, o ntinu vonda kekumponda.’

Daniele wavanga ndomba mosi. Wavovesa nyingidi vo: ‘Dodokolo, utuvana kaka ndunda yo maza mu lumbu kumi. I bosi, ututezanesa ye matoko ana bedianga madia ma ntinu.’ O nyingidi watambulwila.

Vava kiafwana e lumbu kumi, Daniele ye akundi andi tatu mpwa yambote bakala yau lutila matoko mankaka. Yave wayangalala kikilu wau banlemvokela. Wavana nkutu Daniele ngangu za bakula e mona-meso ye ndozi.

Vava bamanisa longoka, Asipenaze watwasa matoko kwa Nebukandesa. O ntinu wamokena yau yo mona vo Daniele, Kananiya, Misaele yo Azareya basunda e ngangu yo lungalala lutila matoko mankaka. Wasola matoko yá mama mu sadila kuna lûmbu lwandi. O ntinu kwa yau kalombanga luludiku mu mambu mamfunu. Yave wabavana ngangu lutila akwa ngangu ye akwa mpandu awonso basadilanga kuna lûmbu lwa ntinu.

Kana una vo mu nsi ya kinzenza bazingilanga, Daniele, Kananiya, Misaele ye Azareya, ke bavilakana ko vo selo ya Yave bakala. Nga ngeye mpe osungamena Yave kana nkutu vo kuna vamosi ko ye mase maku?