Yuˇdaꞈ chaw hui ve awˬ hoˉ awˬ naˬ jawˇ mawˇ Neˍbuˍhkaˍneˍzaˍ Baˍbuˍlonˍ venˇ lo shiˍ laˬ htaˇ, yawˇ hui ve awˬ yaˇ awˬ duˬ shu aꞈ kehˉ cuˇ yiˍ cawˬ leh chehˇ sha puiˉ ve chaw htaꞈ leuˆ yuˬ˗oꞈ tehꞈ yawˇ maꞈ yaˇ htaꞈ kʼoˆ piˇ ve yoˬ. Baˍbuˍlonˍ ve jawˇ mawˇ htaꞈ a yeˇ uiˍ ve kanˉ te piˇ tuˬ awˬ pon, yaˇ nehˬ chi teˇ hpaˍ htaꞈ 3 hkʼawꞈ hkʼa gaˬ maˍ piˇ ve yoˬ. Neˍbuˍhkaˍneˍzaˍ lehˬ yaˇ nehˬ chi teˇ moˍ htaꞈ hawˉ yehˬ hkʼaw awˬ hoˉ te chehˇ ve Aˍshaˆbeˍnaˆ htaꞈ haꞈ shaˉ tcuh ve yoˬ. Baˍbuˍlonˍ chaw hui ve liꞈ gʼaw puiˉ tuˬ, liꞈ bvuhꞈ puiˉ tuˬ, tawˇ hkawˇ yaw puiˉ tuˬ maˍ piˇ leh jawˇ mawˇ leh hawˉ yehˬ hkʼaw kanˉ te chehˇ ve chaw hui caˇ ve hkʼa shuˍ te caˍ piˇ ve yoˬ. Aˍshaˆbeˍnaˆ lehˬ yaˇ nehˬ 4 gʼaˇ htaꞈ Baˍbuˍlonˍ chaw hui ve awˬ meh awˬ suhˉ meh piˇ ve yoˬ. Daˍyeˍlaˆ lehˬ Beˍlaˍtaˍshaˍzaˍ, Haˍnaˍniˆ lehˬ Shaˆdraˆ, Miˆsheˍlaˆ lehˬ Meˍshehˆ, Aˍzaˍriˆ lehˬ Aˍbeˍdaˍneˍgoˍ tehꞈ meh piˇ ve yoˬ. Chi hkʼe te maˍ piˇ ve lehˬ yawˇ hui Yaˬhoˉvaˬ htaꞈ oˉ kʼoˍ maˇ pui tuˬ te piˇ gʼa˗aw laˇ?

 Yaˇ nehˬ 4 gʼaˇ Yaˬhoˉvaˬ hkawˇ hkʼaˬ htaˆ kaꞈ na yuˬ tuˬ yoˬ tehꞈ dawˇ cheˆ taˍ ve yoˬ. Yaˬhoˉvaˬ ve awˬ liˇ tawˇ hkawˇ awˬ hkʼaw lo Baˍbuˍlonˍ chaw hui ve caˇ tuˬ teˇ hpaˍ hpaˍ maˇ daꞈ kehˬ tehꞈ yawˇ hui shiˍ ve yoˬ. Yawˇ hui Aˍshaˆbeˍnaˆ htaꞈ kʼoˆ piˇ ve, ‘jawˇ mawˇ ve caˇ tuˬ ngaˬ hui htaꞈ taˇ yuˬ caˍ laˇ.’ Yaꞈ hkʼaˇ, Aˍshaˆbeˍnaˆ kʼoˆ ve, ‘nawˬ hui caˇ tuˬ maˇ caˇ leh awˬ kaˍ awˬ nu yaˇ nehˬ aꞈ kehˉ awˬ gʼaˇ maˇ cawˬ ve htaꞈ jawˇ mawˇ mawˬ ve kʼo, yawˇ ngaˬ htaꞈ tiˇ pehˍ laˇ tuˬ yoˬ!’

Daˍyeˍlaˆ teˇ ceuˬ dawˇ gʼa leh nyi haꞈ shaˉ chehˇ ve chaw htaꞈ kʼoˆ piˇ ve, ‘nawˬ ngaˬ hui htaꞈ 10 nyi hkʼa gaˬ lawˇ nyi˗o. Gʼawˇ hpaꞈ mvuhˬ naweh leh iˉ kaˆ ceh tiˉ peꞈ laˇ˗oˆ. Oˇ ve hkʼawꞈ nawˉ, ngaˬ hui htaꞈ jawˇ mawˇ ve caˇ tuˬ caˇ ve yaˇ nehˬ hui htaꞈ tehˆ daꞈ nyi˗o.’ Nyi haꞈ shaˉ paˍ htawˇ gʼaꞈ te ve yoˬ.

10 nyi gaˬ leh Daˍyeˍlaˆ leh awˬ chawˇ 3 gʼaˇ awˬ nu ve yaˇ nehˬ teˇ gʼaˇ le le aꞈ kehˉ awˬ gʼaˇ awˬ shaˉ cawˬ leh chehˇ sha puiˉ ve htaꞈ gʼa mawˬ ve yoˬ. Yawˇ hui na yuˬ ve htaꞈ Yaˬhoˉvaˬ ha lehˬ jaˇ. Yawˇ Daˍyeˍlaˆ htaꞈ zuhꞈ maˆ tcuhˉ kuiˬ yuˬ tawˆ puiˉ ve cuˇ yiˍ piˇ ve yoˬ.

Maˍ piˇ peuˬ hkʼawꞈ nawˉ, Aˍshaˆpeˍnaˆ lehˬ jawˇ mawˇ Neˍbuˍhkaˍneˍzaˍ htaꞈ yaˇ nehˬ chi teˇ moˍ shiˍ maˍ piˇ ve yoˬ. Jawˇmawˇ yawˇ hui geh tawˇ yaw daꞈ nyi htaˇ, Daˍyeˍlaˆ, Haˍnaˍniˆ, Miˆsheˍlaˆ leh Aˍzaˍriˆ hui lehˬ awˬ nu ve yaˇ nehˬ teˇ gʼaˇ le le aꞈ kehˉ cuˇ yiˍ cawˬ ve tehꞈ yawˇ gʼa mawˬ ve yoˬ. Hkʼe te leh, yawˇ hui 4 gʼaˇ htaꞈ leuˆ yuˬ leh jawˇ mawˇ ve hawˉ yehˬ hkʼaw kanˉ te tcuh ve yoˬ. A yeˇ uiˍ ve awˬ lawn htaꞈ beˆ maˍ laˇ tuˬ, jawˇ mawˇ yawˇ hui geh lawˬ ve yoˬ. Jawˇmawˇ ve cuˇ yiˍ cawˬ paˍ, mawˉ paˍ leh faˍ te puiˉ paˍ hui aꞈ kehˉ yawˇ hui cuˇ yiˍ cawˬ tuˬ Yaˬhoˉvaˬ ga piˇ ve yoˬ.

Yawˇ hui shu mvuhˇ miˬ lo chehˇ ve htawˇ, Daˍyeˍlaˆ, Haˍnaˍniˆ, Miˆsheˍlaˆ leh Aˍzaˍriˆ Yaˬhoˉvaˬ ve chaw hpehꞈ ve tehꞈ maˇ leunˇ. Yaˇ nehˬ 4 gʼaˇ chi hkʼa shuˍ nawˬ awˬ pa awˬ e htaꞈ gʼa hpaˆ daꞈ chehˇ ve kʼo, Yaˬhoˉvaˬ htaꞈ dawˇ nawˇ tuˬ laˇ?