Pavua Nebukadenesâ muye ne bakokeshi ba mu Yuda mu Babilona, wakateka Ashepanaza muena mudimu wa mu lubanza luende bua kubatangila. Nebukadenesâ bua kukeba bansongalume bavua ne makanda a mubidi mimpe menemene ne lungenyi lua bungi kupita bakuabu munkatshi muabu. Bavua ne bua kulongesha bansongalume aba munda mua bidimu bisatu. Kalasa aku kavua ne bua kubalongolola bua kuikala bantu banene mu Babilona. Bansongalume abu bavua ne bua kulonga mua kubala muakulu wa mu Babilona wa tshiena Akada, kuwufunda, ne kuwakula. Bavua kabidi babalomba bua kudia biakudia bivua mukalenge ne bena mudimu ba mu lubanza luende badia. Munkatshi mua bansongalume abu muvua bansongalume banayi aba: Danyele, Hananiya,  Mishaele, ne Azaya. Ashepanaza wakabapesha mêna makuabu a mu Babilona aa: Beleteshasâ, Shadalaka, Meshaka, ne Abedenego. Malu avuabu babalongesha au avuaku mua kubapangisha bua kuenzela Yehowa mudimu anyi?

Bansongalume banayi aba bavua badisuike bua kutumikila Yehowa. Bavua bamanye ne: kabavua ne bua kudia biakudia bia mukalenge to, bualu mikenji ya Yehowa ivua yamba ne: bimue bia ku biakudia ebi kabivua bimpe ku mêsu kuende to. Nunku bakambila Ashepanaza ne: ‘Kutupeshiku biakudia bia mukalenge to.’ Ashepanaza wakabambila ne: ‘Nuenu kanuyi badie ne mukalenge yeye munumone ne mubidi mubi, neanshipe!’

Danyele wakapeta lungenyi. Wakambila mulami wabu au ne: ‘Tupesha koku anu bisekiseki ne midioko ne mâyi bua matuku dikumi. Pashishe utufuanyikije ne bansongalume badi badia biakudia bia mukalenge.’ Mulami au wakitaba.

Matuku dikumi bamane kuenza bualu ebu, Danyele ne bena diende basatu bavua ne mibidi mimpe mitambe kupita nsongalume mikuabu yonso. Yehowa wakasanka bikole bua muvuabu bamutumikile. Wakapesha too ne Danyele meji a kujingulula bikena kumona ne bilota.

Pavuabu bajikije kulonga, Ashepanaza wakaya ne bansongalume bonso kumpala kua Nebukadenesâ. Mukalenge wakayukila nabu, kumonaye ne: Danyele, Hananiya, Mishaele, ne Azaya bavua ne meji a bungi ne bakazamuke kupita bansongalume bakuabu bonso. Wakasungula bansongalume banayi aba bua kuenzabu mudimu mu lubanza luende lua bukalenge. Mukalenge eu uvua ne tshibidilu tshia kubalomba mibelu kumpala kua kuangata mapangadika manene. Yehowa wakabapesha meji a bungi kupita bena meji ne bena majimbu bonso ba mukalenge.

Nansha muvua Danyele, Hananiya, Mishaele, ne Azaya mu buloba bua ku babende, kabavua bapue muoyo ne: bavua bantu ba Yehowa to. Neuvulukaku pebe Yehowa misangu yonso, nansha padi baledi bebe kabayi nebe anyi?