Aʼyeju kuʼxun nim kyoklen toj tnam Judá i ex tiʼn Nabucodonosor toj tnam Babilonia ex kubʼ tqʼoʼn jun taqʼunal nim toklen, aju Aspenaz tbʼi te xqʼuqil kye. Ax ikx xi tqʼamaʼn Nabucodonosor te Aspenaz tuʼn kyjaw tjyoʼn qeju kuʼxun mas tbʼanel ex mas at kynabʼil kyxol qeju kuʼxun nim kyoklen te Judá. Toj oxe abʼqʼi xi qʼoʼn jun xnaqʼtzbʼil nim toklen kye kuʼxun lu tuʼntzun tonin kyiʼj tuʼn tok qʼoʼn kyoklen toj tnam Babilonia. Xi yekʼin kye tuʼn tbʼant kyuʼjin, tuʼn tbʼant kytzʼibʼin ex tuʼn tbʼant kyyolin toj yol acadio, aju kyyol xjal te Babilonia. Ax ikx iltoq tiʼj tuʼn t-xi kywaʼn axju wabʼj in xi qʼoʼn toj tja aj kawil. Kyxol qeju kuʼxun ten Daniel, Hananías, Misael ex Azarías. Pero ok tqʼoʼn Aspenaz kybʼi ik tzeʼn qe xjal te tnam Babilonia: Beltsasar, Sadrac, Mesac ex Abednego.  ¿Tiʼ teya t-xim tiʼj? ¿I elpe paʼn tiʼj Jehová tuʼnju xnaqʼtzbʼil xi qʼoʼn kye?

Aʼyeju kyaje qʼa lu, kyajbʼiltoq tuʼn kukx kyajbʼen te Jehová. Ojtzqiʼntoq kyuʼn qa mintiʼ tuʼn t-xi kywaʼn twa aj kawil tuʼnju at junjun kychiʼ aj kawil otoq tzaj tqʼamaʼn Tley Jehová tuʼn miʼn t-xi kywaʼn aj Israel. Tuʼntzunju, xi kyqʼamaʼn kuʼxun te Aspenaz: «Bʼinchama xtalbʼil qeye, miʼn qo ok t-obligarina tuʼn t-xi qwaʼne axju twa aj kawil». Pero xi tqʼamaʼn Aspenaz jlu kye: «Qa mintiʼ ẍe waʼnxixe, ex qa ma tzʼok tqʼoʼn aj kawil twitz tiʼj qa yabʼ ateʼye, ok chin kʼwel bʼyoʼne tuʼn».

Ul jun nabʼil toj twiʼ Daniel. Xi tqʼamaʼn jlu teju xqʼuqil: «Najsama, qape jaku tzaj tqʼoʼna oʼkx verdura, itzaj ex aʼ qeye toj 10 qʼij. Aj tikʼ jlu, jaku tzʼok tqʼoʼna twitza qiʼje junx kyukʼil txqantl qʼa, aʼyeju kxel kywaʼn axju twa rey». Bʼaʼn ela jlu toj twitz xqʼuqil.

Tej tikʼ 10 qʼij, mastoq tbʼanel taʼ Daniel kyukʼil tamiw kywitz qeju txqantl qʼa. Nimxix tzalaj Jehová kyiʼj tuʼnju kukx e ajbʼen te. Ax ikx xi tqʼoʼn Jehová tnabʼil Daniel tuʼn tel tnikʼ kyiʼj witzikʼ.

Tej tkubʼ bʼaj oxe abʼqʼi kyxnaqʼtzbʼil qʼa, i ex qʼiʼn tuʼn Aspenaz twitz Nabucodonosor. Yolin aj kawil kyukʼil ex el tnikʼ tiʼj qa mas at kynabʼil Daniel, Hananías, Misael ex Azarías kywitz txqantl kuʼxun. Tuʼntzunju, e jaw tjyoʼn tuʼn kyaqʼunan toj tkawbʼil. Tej tikʼ jlu, nim maj xi tqanin aj kawil nabʼil kye tiʼj junjun tiʼchaq nim toklen. Xi tqʼoʼn Jehová mastl kynabʼil kywitz txqantl xjal at kynabʼil ex qe chman ateʼ toj ja te kawbʼil.

Nya atztoq ateʼ Daniel, Hananías, Misael ex Azarías toj kytnam, pero kukx tzaj kynaʼn qa tmajen Jehová qe. ¿Yajtzun teya? Qa nya atz ateʼ ttata tukʼila, ¿kukxpe kximela tiʼj Jehová?