Nabucodonosor ojts dyajnëjkxy ja prinsipes diˈib Judá jam Babilonia, ets yëˈë tyuknipëjkë Aspenaz diˈib tuump mä ja reyë yˈanaˈamdakn parë tkuentˈatët. Nan ojts ttukˈaneˈemy ets twinˈixëdë yaˈayˈënäˈk mä ja prinsipes, pën diˈib kuwijy ets oy mëk parë tëgëk jëmëjt yˈëxpëktët ets tyundët jëjpˈam mä ja Babilonia käjpn. Nan tsojkëbë nety yajtukniˈˈixëdët wiˈix yajjäˈäy ets yajkajpxy ja ayuk diˈib tuump Babilonia. Ets nan yëˈë nety kyayan yˈuugandëp ja käˈäy ukën diˈib yajpëjtakp mä ja reyë tyëjk. Tyäˈädë nimäjtaxkpë yaˈayˈënäˈk diˈib yajwinˈijxtë, yëˈë Daniel, Hananías, Misael etsë Azarías. Per ja Aspenaz duˈun xyëëwmooyëdë extëm txëwˈattë ja Babilonia jäˈäy: Beltsasar, Sadrac, Mesac ets Abednego.  Wiˈix mˈokwinmay, ¿mbäädëdaa nety tyukmëjagamgaˈagëdë Jyobaa ja ëxpëjkën diˈib yˈaxäjëyandëp?

Tyäˈädë nimäjtaxkpë yaˈayˈënäˈkuˈunk të netyë wyinmäˈäny tpëjtäˈäktë ko tmëmëdowäˈändë Jyobaa. Nyijäˈäwëdëbë nety ko kyaj yˈoyëty tkay tˈuuktët ja reyë kyaaky tyojkx mët ko tam diˈib yajkubojkypyë Jyobaa Lyey. Pääty tˈanmääytyë ja Aspenaz: “Tunë mayˈäjtën, këdiits xytyukˈaguanëˈattë reyë kyaaky tyojkx”. Per ja Aspenaz ta yˈatsooy: “Pën kyaj yajxon mgay mˈuuktë, ta rey mˈixäˈänëdë yaˈˈayow yaˈˈamäˈät ets nëjkxëbëts xyyaˈooky”.

Daniel ta wyinmäˈänybyaty, ets ta tˈanmääy ja tyuumbë Aspenaz diˈib kuentˈäjtëdëp: “Tunë mayˈäjtën, mmooytyëgëts mäjk xëëw, yëˈëyë ääy ujts etsë nëë. Tatsë net xyˈijxkijpxyëdët mëdë wiinkpë ënäˈkëty diˈib të tjëˈxtë ja reyë kyaaky tyojkx”. Ta tkupëjky ja tyuumbë Aspenaz.

Ko nyajxy mäjk xëëw, yëˈë niˈigyë oy mëk këxëˈktë ja Daniel mët ja nidëgëëkpë myëtnaymyaayëbë. Jyobaa jantsy jotkujk nyayjäˈäwë ko tyäˈädë ënäˈk myëmëdoowëdë. Ets myooyë wijyˈäjtënë Daniel parë dyajniwij dyajnikajëdë kumäˈäy ets tijaty yajtukˈijx.

Ko ja ëxpëjkën ojts dyajkäˈpxtë tëgëk jëmëjt, ta ja Aspenaz ojts wyoownëjkxëdë mä ja rey Nabucodonosor. Ta ja rey myëtmaytyakëdë ets tpëjkyë kuentë ko Daniel, Hananías, Misael etsë Azarías, yëˈë diˈib mas kuwijˈyëty mä ja myëguˈuktëjk. Pääty, yëˈë wyinˈijx parë tyundët mä ja kyutujktakn. Ok, yëˈë ja rey amdoowëdë ëwij käjpxwijënë mä wiˈix tijaty ttunët. Ta Jyobaa myooyëdë niˈigyë wijyˈäjtën, këdiinëm niˈamukë ja reyë wyijyjyaˈayëty etsë xyëwëj xyëmaabyëty.

Daniel, Hananías, Misael etsë Azarías, kyaj nety yajpäättë mä ja nyax kyäjpn, per xëmë tjamyajtstë ko yëˈë myëduundëbë Jyobaa. Ets mijts, ¿nan xëmë xyjamyatsäˈänyë Jyobaa oyë mdääk mdeety mëët mgayajpäädët?