A Nebukadnezaar yõga Zida na-yirã kom-dibli n kẽng Babilond. Beenẽ, a kɩtame t’a tʋm-tʋmd b sẽn boond t’a Aspenaaz ges b yelle. A yeel-a lame t’a ges n yãk kom-bɩɩs nins sẽn tar laafɩ, yam la bãngrã, n zãms-b yʋʋm a tãabo, tɩ b wa tõog n lebg Babilond tẽngã nin-kãsemse. B ra segd n zãmsa akadiẽ buud-gomdã, n tõe n karem la b gʋlse. B ra segdame me n dɩ rɩɩb ning rĩmã ne na-yirã neb sẽn dɩtã. A Dãniyɛll, a Hananiya, a Misayɛll, ne a Azariya ra bee kom-bɩɩsã sʋka. A Aspenaaz kõ-b-la Babilond yʋya. Yaa a Bɛlsatzaar, a Sadrak, a Mesak ne a Abɛdnego. La rẽ yĩnga, b sẽn zãms bũmb ningã kɩtame tɩ b bas a Zeova bɩ?

 Kom-bɩɩs a naasã yãka yam n sak a Zeova. B ra miime tɩ b pa segd n dɩ na-yirã rɩɩb ye. Bala a Zeova tõogã wilgame tɩ rũms kẽer la b pa segd n wãbe. Rẽ n so tɩ b yeel a Aspenaaz yaa: ‘D bõos tɩ f ra kõ tõnd na-yirã rɩɩb ye.’ La a Aspenaaz yeelame: ‘Yãmb sã n pa rɩ na-yirã rɩɩbo, tɩ rĩmã yã tɩ y ka tar laafɩ, a na n kʋʋ maam.’

A Dãniyɛll bãnga b sẽn tõe n maane. A yeela sẽn da get-a bãmb yellã yaa: ‘D bõos tɩ f kõ tõnd zẽ-vãad la koom bala, rasem piig pʋgẽ. Rẽ poor bɩ f mak tõnd ne kom-bɩɩs nins sẽn dɩt na-yirã rɩɩbã n gese, ãnd dãmb n tar laafɩ n yɩɩda.’ A Aspenaaz sakame.

Rasem piigã poore, a Dãniyɛll ne a zo-rãmb a tãabã ra yaa sõma n yɩɩd kom-dibli a taabã. A Zeova sũur yɩɩ noogo, b sẽn sak-a wã yĩnga. A kõo a Dãniyɛll yam la bãngr wʋsgo, t’a tõe n wilg zãmsd võore.

Yʋʋm a tãabã poore, a Aspenaaz talla kom-dibli wã n kẽng a Nebukadnezaar nengẽ. Rĩmã sõsa ne-ba, la a mikame t’a Dãniyɛll, a Hananiya, a Misayɛll la a Azariya yamã la b bãngrã yɩɩda kom-bɩɩs a taabã. A yãka bãmb b naasã tɩ b na n tʋmd na-yirã. Yɛl kẽer pʋgẽ, rĩmã mi n kot-b-la saglse. A Zeova kõ-b-la yam sẽn yɩɩd rĩmã yam-dãmbã la a bag-bʋgdbã fãa.

Baa ne a Dãniyɛll, a Hananiya, a Misayɛll la a Azariya sẽn da be tẽng a to wã, b pa tol n yĩm tɩ yaa a Zeova la b tũud ye. Fo me na n tẽega a Zeova yell wakat fãa, baa f roagdbã pa be ne-f bɩ?