Sho omukwaniilwa Nebukadnezzar a fala omalenga gaJuda kuBabilonia, okwa lombwele aakwiita ye ya hogolole aamati aagundjuka Aajuda mboka ye na oonkondo noondunge. Aamati mboka oya li taya ka dheulwa omimvo ndatu. Edheulo ndyoka olya li tali ningwa nelalakano ya kale omalenga ga simana muBabilonia. Oshinakugwanithwa shoka omukwaniilwa Nebukadnezzar okwa li e shi pe elenga lyomuuwa we, Aspenas. Aamati mboka oya li ye na okwiilonga okulesha, okunyola nokupopya elaka lyAababilonia. Oya li wo ye na okulya iikulya mbyoka hayi liwa komukwaniilwa naambala ye. Yamwe yomaamati mboka ya hogololwa oyo: Daniel, Hanania, Mishael naAzaria. Aspenas okwe ya luku omadhina  gOshibabilonia: Beltshazzar, Shadrak, Meshak naAbednego. Mbela oya li taye ke etha po okulongela Jehova, omolwedheulo ndyoka ya pewa?

Aamati mboka yane oya li ya tokola toko okuvulika kuJehova. Oya li ye shi kutya kaye na okulya iikulya yomukwaniilwa, oshoka Ompango yaJehova oya ti kutya iikulya yimwe yomuyo oya li ya nyata. Onkee oya lombwele Aspenas ya ti: ‘Tse inamu tu pa iikulya mbyoka hayi liwa komukwaniilwa.’ Aspenas okwe ya yamukula a ti: ‘Ngele itamu yi li, omukwaniilwa e te mu mono mwa nanga, nena ota ka dhipaga ndje.’

Daniel okwa kongo po ondunge. Okwa lombwele omutonateli gwawo a ti: ‘Tu pa owala tu lye oomboga notu nwe omeya, uule womasiku omulongo. Opo ihe to tu yelekanitha naamati yomombala mboka haya li iikulya yomukwaniilwa.’ Omutonateli okwe shi zimine.

Konima yomasiku omulongo, Daniel nookuume ke yatatu, oya li yo ondoka ye vule aamati yalwe yomombala. Jehova okwa li a nyanyukwa, sho ya vulika kuye. Okwa pe nokuli Daniel omagano gokuuva ko omamoniko noondjodhi.

Sho edheulo lya pu, Aspenas okwe eta aamati komukwaniilwa Nebukadnezzar. Omukwaniilwa okwa popi nayo nokwa mono kutya Daniel, Hanania, Mishael naAzaria oye na oondunge nuunongo ye vule aamati yalwe ayehe. Okwe ya hogolola ya longe mombala ye. Omukwaniilwa okwa li he ya pula olundji omayele kombinga yiinima ya simana. Jehova okwe ya pe oondunge dhi vule dhoonganga nodhoompulile adhihe dhomukwaniilwa.

Daniel, Hanania, Mishael naAzaria inaya dhimbwa kutya yo oyomoshigwana shaJehova, nonando oya li koshilongo shilwe. Mbela nangoye oto ke ya holela ngaa, nokuli nuuna kuu li naavali yoye?