Nabucodonosor okinuikak Babilonia ikoneuan akin ueyixtoyaj Judá, niman okitlali itlakeual itoka katka Aspenaz makintlajpiya. Nabucodonosor okijli Aspenaz makintlapejpeni akin chikaujkej niman tlamachilisejkej. Yejon telpokamej kiseliskiaj tlamachtijli yeyi xiuitl, niman ijkon uejueyixtoskiaj ipan Babilonia. Nonekiya nomachtiskej amapouaskej, tlajkuiloskej niman tlajtoskej tlajtojli acadio tlen nokuiya Babilonia. Noijki nonekiya kikuaskej tlakuajli tlen tekiuaj kikuaya. Nauimej itech yejuin telpokamej katkaj Daniel, Hananías, Misael niman Azarías. Aspenaz okintokayoti ken babilonios: Beltsasar, Sadrac, Mesac niman Abednego. ¿Tiknemilia ika tlamachtijli tlen kiseliskiaj kichiuaskia makikauakan Jehová?

 Yejuin nauimej telpokamej okijtokej ika nochipa kitlakamatiskiaj Jehová. Kimatstoyaj ika xkuajli yeskia tla kikuaskej tlen tekiuaj kikuaya pampa ipan iTlanauatil Jehová xtekauiliaya manokua seki yolkamej. Kuakon okijlikej Aspenaz: “Timitstlajtlaniliaj maka xtexchiualti matijkuakan tlakuajli tlen tekiuaj kikua”. Aspenaz okimijli: “Tla nemejuamej xkuajli nentlakuaj niman tekiuaj kita ika xnenchikaujtokej, yejua nechmiktis”.

Daniel okinemili itlaj kichiuas. Okijli akin kintlajpiaya: “Timitstlajtlaniliaj ika san xtechmaka kijli niman atl ipan majtlaktli tonajli. Sakin, xtechixtlalo niman noijki oksekimej telpokamej akin kikuaj tlakuajli tlen kikua tekiuaj”. Akin kintlajpiaya ijkon okichiuj.

Ijkuak yopanoka majtlaktli tonajli, Daniel niman akin inuan nouikaya nesiyaj melak chikaujkej xijkon ken oksekimej telpokamej. Jehová oyolpak pampa okitlakamatkej. Noijki okimakak tlamachilistli Daniel, ijkon okasikamat tlen kijtosnekij tlatlachalistin niman temiktli.

Ijkuak otlan ika okinmachtijkej, Aspenaz okinuikak telpokamej ixpan Nabucodonosor. Tekiuaj imiuan otlajto niman okitak ika Daniel, Hananías, Misael niman Azarías melak tlamachilisejkej katkaj xijkon ken oksekimej telpokamej. Kuakon okintlapejpeni matekitikan ipan itekiuajyo. Sakin, tekiuaj miyekpa kintlajtlaniliaya makitlajtolpaleuikan itech tlen melak nonekiya. Jehová okichiuj makipiyakan tlamachilistli xijkon ken tlamachilisejkej akin tekitiyaj itech tekiuaj nion ken akin tenaualuiyaj.

Maski Daniel, Hananías, Misael niman Azarías xnemiyaj inchan, xkeman okilkaujkej ika teuan katkaj itech ikalpan Jehová. Niman tejua, ¿noijki nochipa tikilnamikis Jehová maski tla motajuan xnemij mouan?